अर्थमन्त्री डा. स्वर्णिम वाग्लेले बुधबार आर्थिक वर्ष २०८२/०८३ को आर्थिक सर्वेक्षण सार्वजनिक गर्नुभएको छ। चालु आर्थिक वर्षको कूल गार्हस्थ्य उत्पादनमा बागमती प्रदेशको हिस्सा सबैभन्दा बढी ३६.७ प्रतिशत र कर्णालीको सबैभन्दा कम ४.२ प्रतिशत रहने अनुमान छ। आर्थिक वर्ष २०८२/०८३ मा बागमती प्रदेशको प्रतिव्यक्ति कूल गार्हस्थ्य उत्पादन सबैभन्दा बढी २,६४४ डलर र मधेशको सबैभन्दा न्यून ९३४ डलर रहने अनुमान गरिएको छ।
सर्वेक्षण सार्वजनिक गर्दै अर्थमन्त्री वाग्लेले संघीयता अभ्याससँगै तीनै तहका आर्थिक–सामाजिक विकासका सूचकमा सुधार आएको दाबी गर्नुभयो। सर्वेक्षणअनुसार बागमती र गण्डकी प्रदेशको आर्थिक वृद्धिदर राष्ट्रिय औसतभन्दा माथि रहेको छ। वित्तीय संघीयता लागू भएयता प्रदेश र स्थानीय तहको सञ्चित कोषमा बचत रहेको सर्वेक्षणले देखाएको छ।
सरकारका अनुसार संघीयता कार्यान्वयनपछि प्रदेश र स्थानीय तह विकास, निर्माण तथा सेवा प्रवाहको केन्द्रका रूपमा विकसित हुँदै गएका छन्। आर्थिक सर्वेक्षणमा मुलुकको समष्टिगत आर्थिक स्थितिलाई समेट्ने वास्तविक, सार्वजनिक, वित्त, मौद्रिक तथा वित्तीय र बाह्य क्षेत्रको समग्र चित्र प्रस्तुत गरिएको छ।
सर्वेक्षणले चालु आर्थिक वर्षमा सबै प्रदेशको आर्थिक वृद्धिदर बढ्ने अनुमान गरिएको छ। बागमती प्रदेश र गण्डकी प्रदेश बाहेक अन्य प्रदेशको आर्थिक वृद्धिदर राष्ट्रिय औसत ३.८५ प्रतिशतभन्दा कम रहने अनुमान गरिएको छ। चालु आर्थिक वर्षको फागुनसम्म प्रदेशगत कूल खर्च १३.१ प्रतिशतले घटेर ५९ अर्ब ५४ करोड रुपैयाँ रहेको सर्वेक्षणमा उल्लेख छ।
