युक्रेन युद्ध सुरु भएयता रोमानियामा रुसी ड्रोन खस्दा पहिलोपटक दुई जनाको चोटपटक भएको छ। रोमानियाले उक्त घटनालाई रसियाको “गम्भीर र गैरजिम्मेवार उत्तेजना” भन्दै कडा निन्दा गरेको छ र एन्टी-ड्रोन सुरक्षा प्रणाली छिटो स्थापना गर्न माग गरेको छ। चार वर्षदेखि जारी युद्ध क्रममा रोमानियाली भूमिमा हालसम्म ४७ पटक रुसी ड्रोनका टुक्रा फेला परेका छन्।
युक्रेन सीमा सँग जोडिएको नेटो सदस्य राष्ट्र रोमानियाको एक आवासीय भवनमा रुसी ड्रोन खस्दा दुई सर्वसाधारण घाइते भएका छन्। रोमानियाको रक्षा मन्त्रालयका अनुसार, छिमेकी युक्रेनको सीमा नजिकै रसियाले गरेको हवाई आक्रमणको क्रममा एउटा ड्रोन पूर्वी शहर गलातीमा रहेको १० तल्ले भवनको छतमा ठोक्किएको थियो। रोमानियाको आपत्कालीन सेवा विभागका अनुसार, ड्रोनमा रहेको सम्पूर्ण विस्फोटक पदार्थ भवनको छतमा विस्फोट हुँदा १०औं तलामा ठूलो आगलागी भएको थियो।
आगलागीपछि करिब ७० जना बासिन्दालाई सुरक्षित स्थानमा सारिएको थियो। सामान्य चोट लागेका दुई जनाको उपचार गरिएको छ। चार वर्षदेखि जारी रसिया-युक्रेन युद्धमा रोमानियाका नागरिकहरू घाइते हुने यो पहिलो घटना हो। रोमानियाली रक्षा मन्त्रालयका अनुसार अहिलेसम्म ४७ पटक रुसी ड्रोनका टुक्रा रोमानियाको भूमिमा भेटिएका छन्, जसमा १२ घटना यसै वर्षका हुन्।
रोमानियाको विदेश मन्त्रालयले यस घटनालाई रसियाको तर्फबाट भएको “गम्भीर र गैरजिम्मेवार उत्तेजना” भन्दै कडा भर्त्सना गरेको छ। रोमानियाले यस विषयमा नेटोका महासचिवलाई जानकारी गराई आफ्ना भूमिमा एन्टी-ड्रोन सुरक्षा प्रणाली छिटो स्थापना गर्न माग गरेको छ। नेटोका प्रवक्ताले सामाजिक सञ्जाल ‘एक्स’ मार्फत रसियाको यस कदमको निन्दा गर्दै नेटो आफ्ना सदस्यहरूको सुरक्षा सुनिश्चित गर्न प्रतिबद्ध रहेको बताएका छन्। रुसी ड्रोन रोमानियामा प्रवेश गर्दा रोमानियाले आफ्ना दुई एफ-१६ लडाकु विमानहरूलाई अलर्ट अवस्थामा राखेको थियो। यस घटनामा रसियाले अहिलेसम्म कुनै आधिकारिक प्रतिक्रिया जनाएको छैन।
