काठमाडौं । भारतको गोवामा जारी साफ महिला च्याम्पियनसिप २०२६ अन्तर्गत नेपालले समूहको दोस्रो तथा अन्तिम खेलमा आज श्रीलंकासँग प्रतिस्पर्धा गर्दैछ। नेपाल र श्रीलंकाबीचको खेल जवाहरलाल नेहरु स्टेडियममा साँझ पौने ५ बजेदेखि सुरु हुनेछ। समूह ए मा रहेको नेपालले पहिलो खेलमा भुटानलाई १–० ले पराजित गरेको थियो भने श्रीलंका भुटानसँग ४–० ले पराजित भएको थियो। नेपाली टोली एन्जिला तुम्बापोको कप्तानीमा रहेको छ र उनीहरूलाई समूह विजेता बन्नका लागि श्रीलंकालाई पराजित गर्नुपर्ने लक्ष्य छ। तर नेपाललाई समूह विजेता हुनको लागि श्रीलंकासँग बराबरी पनि पर्याप्त हुनेछ भने श्रीलंका सेमिफाइनल प्रवेशका लागि नेपाललाई पराजित गर्नु अनिवार्य छ।
नेपालको नियमित कप्तान र गोल मेसिन सावित्रा भण्डारी (साम्बा) घुँडाको चोटका कारण हाल टिममा छैनिन्। घुँडामा शल्यक्रियापछि उनी आराममा छिन्। त्यस्तै सविता रानामगर पनि चोटका कारण मैदान बाहिर छन्। कम्बोडियामा लिग खेलिरहेको प्रीति राई यात्रा कारण भुटानविरुद्धको पहिलो खेल खेल्न पाइनन्। नियमित खेलाडीको अनुपस्थितिमा नेपालले भुटानविरुद्ध पहिलो खेलमा एक मात्र गोल गर्यो जुन डिफेन्डर गीता रानाले गरेकी थिइन्। नेपालको अग्रपंक्ति सम्हालिरहेका रश्मि कुमारी घिसिङ, रेखा पौडेलसँगै युवा फरवार्ड मिना देउवा र पूर्णिमा राईलाई श्रीलंका विरुद्ध गोल गर्दै सेमिफाइनलको तयारी गर्ने अवसर छ।
हाल नेपाल र भुटान दुबैको समान ३ अंक छ। भुटानले दुई खेल सकाइसकेको छ र गोलअन्तरमा अगाडि रहेर शीर्ष स्थानमा छ। त्यसैगरी समूह बी अन्तर्गत साविक विजेता बंगलादेश र गृहदेश भारतबीच आज राति पौने ८ बजे खेल हुनेछ। दुवै टोलीले माल्दिभ्सलाई पराजित गरेर सेमिफाइनलमा स्थान सुनिश्चित गरिसकेका छन्। यसैले यो खेल समूह बी को विजेता निर्धारण गर्ने निर्णायक हुनेछ। दुवै समूहका शीर्ष दुई टोली सेमिफाइनलमा प्रवेश गर्नेछन् जसको खेल जुन ३ र फाइनल जुन ५ मा हुनेछ। साफ महिला च्याम्पियनसिपको यो आठौँ संस्करण हो। अहिलेसम्म भारतले सर्वाधिक पाँचपटक उपाधि जितेको छ भने बंगलादेश पछिल्लो दुई संस्करणको च्याम्पियन हो। नेपालले अहिलेसम्म छपटक फाइनल पुग्दा पनि उपाधि जित्न सकेको छैन।
