बागमती पुल । कान्ति लोकपथको बागमती खोला पुलबाट शनिबार साँझ मालवाहक गाडी खस्दा चालक दलबहादुर बर्तौलाको मृत्यु भएको छ। हाइड्रोपावरको फलामे पाइप लोड गरिएको ना ६ ख ४०४२ नम्बरको गाडी अनियन्त्रित हुँदै पुलबाट खोलामा खस्न गएको प्रहरीले जानकारी दिएका छन्। दुर्घटनामा हामफालेका १७ वर्षीय सहचालक प्रशन्न प्रजा सकुशल रहेको मकवानपुरका प्रहरी नायब उपरीक्षक माधवप्रसाद काफ्लेले बताए।
मकवानपुरको भिमफेदी गाउँपालिका–८ बगुवास्थित कान्ति लोकपथमा पर्ने बागमती खोला पुलबाट शनिबार साँझ खसेको गाडीका चालक स्टेरिङमै मृत फेला परेका छन्। मकवानपुर र ललितपुर जोड्ने बागमती पुलबाट ना ६ ख ४०४२ नम्बरको टेलर गाडी शनिबार बेलुका खसेको थियो। सो गाडीका चालक, हेटौंडा उपमहानगरपालिका–३ बस्ने ३० वर्षीय दलबहादुर बर्तौला स्टेरिङमै मृत अवस्थामा भेटिएका छन् भनी जिल्ला प्रहरी कार्यालय मकवानपुरले जानकारी दिएको छ।
उक्त गाडी क्रेनको सहयोगले खोलाबाट निकालिएको छ। मकवानपुरका प्रहरी नायब उपरीक्षक माधवप्रसाद काफ्लेका अनुसार बागमती हाइड्रोपावरका फलामे पाइप लोड गरेर मकवानपुरबाट काठमाडौं जाँदै गर्दा पाइप बाँधिएको टुचिन (बन्धन) छुटेर गाडी अनियन्त्रित भई पुलबाट खोलामा खसेको थियो। गाडीमा चालक र सहचालक गरी दुई जना सवार थिए। सहचालक १७ वर्षीय प्रशन्न प्रजा आफैं हामफालेका थिए। उनी सकुशल छन् भने चालकको मृत्यु भएको डिएसपी काफ्लेले बताएका छन्।
