‘रोल नं १’ हेरेपछि विद्यार्थीहरूको प्रतिक्रिया – हामीजस्ता विद्यार्थीले अवश्य हेर्नुपर्ने फिल्म
समाचार सारांश समीक्षा पश्चात तयार गरिएको। शैक्षिक प्रणाली र बालमनोविज्ञानमा आधारित नेपाली फिल्म ‘रोल नं १’ गत शुक्रबारदेखि प्रदर्शनमा आएको छ र दर्शकबाट सकारात्मक प्रतिक्रिया प्राप्त गर्दैछ। फिल्मले विद्यमान शैक्षिक प्रणाली र मूल्याङ्कन विधिको कारण बालबालिकाले भोग्नुपरेको मानसिक दबाबलाई मुख्य रूपमा उजागर गरेको छ। निर्माता विनोद पौडेलले विद्यार्थीको मनोभावना बुझ्न शिक्षक र अभिभावकले आफ्ना बालबालिकासँगै यो फिल्म अवश्य हेर्नुपर्ने उल्लेख गरे।
काठमाडौं। कथानक फिल्म ‘रोल नं १’ ले दर्शकबाट सकारात्मक प्रतिक्रिया पाएको छ। शैक्षिक कथावस्तुलाई केन्द्रमा राखेर निर्माण गरिएको यो फिल्मले शिक्षण प्रणालीबाट अभिभावक र विद्यार्थी कसरी प्रभावित छन् भन्ने मार्मिक कथा प्रस्तुत गर्छ। निर्माता विनोद पौडेलका अनुसार, फिल्म हेरेका विद्यार्थीहरूले यो फिल्म मन पराएको र सबै विद्यार्थीले हेर्नुपर्ने बताए। ‘हामीले जुन उद्देश्यले यो फिल्म बनाएका थियौं, त्यो पूरा भयो,’ पौडेलले भने, ‘हेरेका विद्यार्थीहरू यसको प्रशंसा गरिरहेका छन् र सबै विद्यार्थीले हेर्नुपर्ने बताइरहेका छन्।’
पौडेलले विद्यार्थीले फिल्म मन पराएकाले अब अभिभावकहरूको कर्तव्य बनेको बताए कि आफ्ना छोराछोरीलाई सिनेमा हलसम्म लिएर गएर ‘रोल नं १’ देखाउनुपर्छ। विद्यार्थीको मनोभावना कसरी बुझ्ने र के पढाउने भन्ने विषय फिल्मले उठाएकोले शिक्षक र अभिभावकहरूले आफ्ना विद्यार्थी तथा छोराछोरीलाई यो फिल्म देखाउनु पर्नेमा उनले जोड दिएका छन्। पौडेलले भने, ‘विद्यार्थी, शिक्षक र अभिभावक वर्ग सँगै बसेर हेर्नुपर्ने फिल्म हो यो। यदि विद्यार्थीले मन नपरेको भए हामीले यो सुझाव नै दिने थिएनौं। आउनुहोस्, आफ्ना बच्चाबच्चीलाई यो फिल्म हेर्न लगाऔं।’
बालमनोविज्ञानमा केन्द्रित यो फिल्मले नेपालका वर्तमान शैक्षिक प्रणालीमा रहेको मूल्याङ्कन विधिले विद्यार्थीहरूमा हुने मानसिक दबाबलाई प्रमुख विषय बनाएर यसले उठान गरेको प्रश्न प्रस्तुत गरेको छ। गलत बुझाइ र दबाबका कारण बालबालिकामा उत्पन्न मानसिक तनावलाई फिल्मले उजागर गरेको छ जुन कथालाई दर्शकहरूले मन पराइरहेका छन्। यो फिल्म शुक्रबारदेखि प्रदर्शनमा आएको छ। कलाकारहरू दर्शक भेट्न हलहरू पुगिरहेका छन्। केही कलाकार मोफसलका हलहरूमा र केही काठमाडौंमा पुगेका छन्। निर्देशक जोन योञ्जनले निर्देशन गरेको फिल्ममा मुकुन भुसाल, सुशांक मैनाली, रेणु योगी, सिर्जना अधिकारी मुख्य भूमिकामा छन्। बालकलाकार रूपमा निर्भिक रेग्मी, रिन्चेन लामा, संयम कटुवाल र सिजल श्रेष्ठका अभिनय छ। विनोद र जान्वी पौडेल निर्माता रहेको फिल्ममा सह-निर्माण छत्रमाया गिरी र रमेश चौलागाईंले गरेका छन्। पटकथा महेश दवाडीले लेखेका हुन् भने छायांकन शिवराम श्रेष्ठले गरेका छन्।
