टेक्सासको ड्यालसमा आयोजना गरिएको ‘हिमालय संवाद’ कार्यक्रममा पत्रकार तथा लेखकहरूले नेपालको भविष्य, साहित्य र डायस्पोराको भूमिकाबारे छलफल गरे। वरिष्ठ पत्रकार सुधीर शर्माले जनआक्रोश भरोसामा परिणत भएको उल्लेख गर्दै नयाँ र पुरानाको ऊर्जा र अनुभव देश विकासमा सहयोगी हुने बताए। पत्रकार बसन्त बस्नेतले डायस्पोरामा रहेका नेपालीहरूको क्षमता, अनुभव र लगानीलाई देश निर्माणमा सदुपयोग गर्न सरकारलाई सुझाव दिए। १७ जेठ, ड्यालस(टेक्सास) ।
टेक्सासको ड्यालसमा शनिबार विभिन्न पेशा, व्यवसाय र विधाका गैरआवासीय नेपालीहरूको अभूतपूर्व जमघट भएको थियो। त्यो जमघटको मुख्य चिन्ता थियो, देश बन्छ कि बन्दैन्? हिमालय खबर र अन्तर्राष्ट्रिय नेपाली साहित्य समाज (अनेसास) टेक्सास च्याप्टरद्वारा आयोजित ‘हिमालय संवाद: कविता र किताबका कुरा’ कार्यक्रममा दोस्रो सत्रमा ‘नेपाल कहाँ जाँदैछ?’ विषयमा गरिएका छलफलमा वरिष्ठ पत्रकार तथा लेखक सुधीर शर्माले देश बन्नेमा विश्वास व्यक्त गरे। नेपालमा एक वर्षअघि केही नहुने गरी आम निराशा छाएको थियो। घृणा र आक्रोश व्याप्त थियो। जेनजी आन्दोलनपछि त्यो घृणा र आक्रोश भरोसामा परिणत भएको छ, शर्माले भने, अहिले जनतामा देश बन्नेमा आशावादिता छ। तर सरकारले जनअपेक्षा पुरा गर्नसक्ने वा नसक्ने कुरा सरकारको कार्यशैलीमा निर्भर रहने शर्माको भनाइ थियो।
पत्रकार बसन्त बस्नेतले पुराना दलहरूले गरेका गल्ती नयाँले नगरे हुन्थ्यो भन्ने जनताको अपेक्षामा सरकारले खरो उतरिनुपर्ने बताए। यसअघिका सरकारले गरेका सबै राजनैतिक नियुक्ति खारेज गरेर सरकारको सुशासन, जवाफदेहिता र पारदर्शिताको परीक्षण पदमा नियुक्तिदेखि नै सुरु हुनुपर्ने पत्रकार बस्नेतको विचार थियो। हाल मौलाएको फरक मत राख्नेलाई दबाउने प्रवृत्ति विगतमा मण्डलेको संज्ञा पाएको र अहिले पनि यस्तै प्रवृत्ति दोहोरिएकाले त्यसलाई रोक्नुपर्ने उनको टिप्पणी थियो।
गैरआवासीय नेपालीका मुद्दामा सरकारले तथा नेपाली मिडियाले अनुदार व्यवहार गरेकोमा सहजकर्ता सञ्जय घिमिरेको गुनासोमा, बस्नेतले विगतमा गैरआवासीय नेपालीप्रति अनुदार भएपनि सरकारले चाँडै नै सकारात्मक प्रतिक्रिया दिने विश्वास व्यक्त गरे। उनले नेपाली मिडिया सदैव गैरआवासीय नेपालीका मुद्दामा सकारात्मक भएको जानकारी दिए। यस्तैगरी, नेपाल निर्माणमा डायस्पोराका नेपालीहरूको योगदान महत्वपूर्ण रहेको उनले बताए। सरकारले डायस्पोरामा रहेका नेपालीहरूको क्षमता, अनुभव, पूँजी र अन्तर्राष्ट्रिय सम्बन्धलाई सदुपयोग गरी देश निर्माणमा लगाउनुपर्ने सुझाव उनले दिए।
