१८ जेठ, काठमाडौं । प्रधानमन्त्री बालेन्द्र शाहले सीमा विवादसँग सम्बन्धित गरेका विवादास्पद अभिव्यक्तिहरूको विषयमा धारणा बनाउन विपक्षी दलहरूको बैठक बस्न लागेको छ। नेपाली कांग्रेस संसदीय दलको कार्यालय सिंहदरबारमा मध्यान्ह १२ बजे बैठक निर्धारित गरिएको छ। विपक्षमा रहेका दलहरूको सर्वदलीय बैठक बस्ने जानकारी कांग्रेसका सचेतक निश्कल राईले दिएका छन्। उनले भने, ‘प्रधानमन्त्रीको अभिव्यक्ति र समसामयिक विषयमा छलफल गर्ने उद्देश्यले सर्वदलीय बैठक बस्न लागेको हो।’
आइतबार प्रतिनिधिसभाको बैठकमा बोल्दै प्रधानमन्त्री शाहले नेपाल–भारत सीमा विवाद कूटनीतिक छलफलबाट समाधान गर्ने विचार राखेका थिए। उनले भनेका थिए, ‘तपाईंहरूलाई पनि अचम्म लाग्ला, मैले पनि प्रधानमन्त्री भएपछि मात्रै थाहा पाएँ– भारतले नेपालको जग्गा मात्र नभएर नेपालले पनि भारतको जग्गा धेरै ठाउँमा मिचेको रहेछ।’ यस्ता अभिव्यक्तिहरूसँगै उनले दुई देशले अध्ययन गरी छलफलबाट समस्या समाधान गर्ने साथीको रूपमा अघि बढ्ने सोच व्यक्त गरेका थिए। प्रधानमन्त्रीको उक्त अभिव्यक्तिप्रति विरोध जनाउँदै विपक्षी दलहरूले संसदीय अभिलेखबाटै सो अभिव्यक्तिलाई हटाउन माग गरेका छन्।
