माटोको भाँडोमा पानी चिसो नहुँदा कारण र समाधानहरू

माटोको भाँडोमा पानी राख्ने क्रममा यसलाई २४ घण्टा पानीमा भिजाउँदा माटोका साना पोर्सहरू खुल्छन् र पानी लामो समयसम्म चिसो रहन्छ। अहिलेको अत्याधिक गर्मी मौसममा धेरै मानिसले चिसो पानी पिउन रुचाउँछन्। फ्रिजमा राखेर पानी चिसो बनाउन सकिन्छ तर यसले केही स्वास्थ्य समस्या निम्त्याउन सक्ने भएकाले यो तरिका उपयुक्त मानिदैन। पानीलाई प्राकृतिक रूपमा चिसो बनाउने एक प्रभावकारी विधि भनेको माटोको भाँडोमा राख्नु हो। माटोको भाँडोले पानीलाई न केवल चिसो राख्छ, तर स्वास्थ्यका लागि पनि लाभदायक हुन्छ र बिजुली बचतमा मद्दत गर्छ।

तर कहिलेकाहीँ अत्याधिक गर्मीमा माटोको भाँडोमा राखिएको पानी पनि तातो हुन सक्छ। यस्तो अवस्थामा के गर्ने? माटोको भाँडोमा पानी राख्नु अघि त्यसको गुणस्तर राम्रोसँग जाँच गर्नु आवश्यक छ। कहिलेकाहीँ नयाँ वा धेरै पुरानो माटोको भाँडो पानी चिसो बनाउन सक्षम हुँदैन। धेरै पुरानो भाँडोमा माटोका साना पोर्सहरू बन्द भइसकेका हुन्छन् जसले चिसोपनमा कमी ल्याउँछ। नयाँ भाँडोमा भने पोर्सहरू खुलेका नहुन सक्छन्। पानी खन्याउनु अघि भाँडोलाई कम्तीमा २४ घण्टा पानीमा भिजाउनुहोस् जसले माटो सफा हुन्छ र पोर्सहरू खुल्छन्।

भाँडोलाई उपयुक्त स्थानमा राख्नु पनि महत्त्वपूर्ण हुन्छ। बाह्य मौसम वा भाँडो राख्ने स्थानले पानीको तापक्रम निर्धारण गर्छ। त्यसैले भाँडोलाई चिसो र हावायुक्त ठाउँमा राख्नुपर्छ। घाम लागेको वा तातो छतको छेउमा नराख्नुहोस्। भाँडोलाई राम्रो हावा पुग्ने ठाउँमा राख्नुपर्छ। भाँडोलाई तलबाट हावा लाग्ने गरी राख्न स्ट्यान्ड प्रयोग गर्न सकिन्छ जुन काठ वा प्लाष्टिकको हुन सक्छ। यसले हावाको प्रवाह बढाउँछ र पानीलाई चिसो राख्न मद्दत गर्छ।

पानीलाई लामो समय चिसो राख्नका लागि उपयुक्त माटोको भाँडो छनोट गर्नु पनि आवश्यक छ। रातो माटोबाट बनेको अनग्लेज्ड भाँडो पानी चिसो राख्न उत्कृष्ट हुन्छ। यस किसिमको माटो छिटो तात्दैन र पानीलाई धेरै समयसम्म चिसो राख्न सक्षम हुन्छ।