चीनसँगको तनावबीच ताइवानले दक्षिण चीन सागरमा रोबोटिक कुकुर परिचालन गर्ने घोषणा गर्यो

ताइवानको सरकारी स्वामित्वको सैन्य निकायले चीनसँग विवादित टापुहरूको सुरक्षा बृद्धिका लागि तीनवटा रोबोट गस्ती कुकुर सार्वजनिक गरेको छ। अमेरिकी कम्पनी ‘घोस्ट रोबोटिक्स’ ले निर्माण गरेका यी रोबोट जासुसी, निगरानी र आक्रमण गर्ने तीन फरक संस्करणमा उपलब्ध छन्। ताइवानका मरिन्स र कोस्ट गार्डले दक्षिण चीन सागरका टापुहरूमा गस्तीका लागि यस्ता रोबोटहरूको तत्काल आवश्यक रहेको जनाएका छन्।

१९ जेठ, काठमाडौं। ताइवानको सैन्य हतियार विकास गर्ने सर्वोच्च निकायले मंगलबार तीनवटा रोबोट गस्ती कुकुर सार्वजनिक गरेको छ। चीनसँग विवाद रहेको दक्षिण चीन सागरका टापुहरूमा सुरक्षा प्रदान गर्न यी रोबोटहरूको प्रयोग गर्न सकिने सैन्य अधिकारीहरूले बताएका छन्। चीनले ताइवानलाई आफ्नो भूभागको रूपमा दाबी गरिरहेको परिस्थितिमा, ताइवानले सम्भावित चिनियाँ आक्रमणलाई रोक्न आफ्नो सेनालाई आधुनिक बनाउँदै लगिरहेको छ।

ताइवानको रक्षा मन्त्रालयमा आयोजित पत्रकार सम्मेलनमा सरकारी स्वामित्वको ‘नेसनल चुङ-सान इन्स्टिच्युट अफ साइन्स एन्ड टेक्नोलोजी’ ले यी चार खुट्टे रोबोटिक कुकुरहरूको प्रदर्शन गरेको हो। यी रोबोटहरू अमेरिकी सैन्य आपूर्ति कम्पनी ‘घोस्ट रोबोटिक्स’ले बनाएका हुन्, जसमा ताइवानी संस्थाले आफ्नो घरेलु प्रविधि समावेश गरेको छ। प्रदर्शन गरिएका रोबोटहरू जासुसी, निगरानी र आक्रमण गर्ने गरी तीन फरक-फरक संस्करणमा उपलब्ध छन्।

आक्रमण गर्ने संस्करणको रोबोटको पिठ्युँमा बन्दुक पनि जडान गरिएको छ। संस्थाको मिसाइल तथा रकेट प्रणाली अनुसन्धान विभागका उपप्रमुख जेन कुओ-कुआङका अनुसार, यस्ता अत्याधुनिक उपकरणहरूको आवश्यकताबारे ताइवानी सेनाले महसुस गरेको भए पनि अहिलेसम्म औपचारिक खरिद आदेश जारी गरिएको छैन। तर, ताइवानका मरिन्स र कोस्ट गार्डले दक्षिण चीन सागरमा पर्ने स्प्राटली (नान्सा) र प्राटास (डोङसा) टापुहरूको तटीय क्षेत्रमा गस्ती र निरीक्षणका लागि यस्ता रोबोटहरूको तत्काल आवश्यकता रहेको बताएका छन्।