२० जेठ, धनगढी। सुदूरपश्चिम प्रदेशका मुख्यमन्त्री एवं कांग्रेस संसदीय दलका नेता कमलबहादुर शाहले संसदीय दलको बैठक बोलाएका छन्। दलको नेताबाट हटाउनुपर्ने निर्णयसहित अविश्वासको प्रस्ताव संसदीय दलको कार्यालयमा दर्ता भएको भोलिपल्टै शाहले बैठक आह्वान गरेका हुन्। शाहले बुधबार (आज) दिउँसो २ बजे मुख्यमन्त्री तथा मन्त्रिपरिषद्को कार्यालयमा बैठक राखेका छन्। बैठकको एजेन्डा भने सार्वजनिक गरिएको छैन।
शाहलाई संसदीय दलको नेताबाट हटाउनुपर्ने निर्णय गर्दै ९ जना सांसदले संसदीय दलको कार्यालयमा अविश्वासको प्रस्ताव दर्ता गरेका थिए। हस्ताक्षरकर्तामध्येकी डम्मरी महराले पार्टी एकता र सरकारको बजेटका लागि भन्दै हस्ताक्षर फिर्ता लिएको घोषणा गरेकी थिइन्। महराको यस युटर्नपछि तत्काल शाहको पद सुरक्षित भएको छ। प्रदेश सभामा १८ जना सांसद रहेका छन्, जसमा महराको निर्णयपछि शाहको पक्षमा ९ र विपक्षमा ८ सांसद रहेका छन्।
प्रकाश देउवा भने अमेरिकामा रहेका छन्। यसैबीच, शाहले संसदीय दलको बैठक बोलाएपछि उनलाई हटाउनुपर्ने पक्षका सांसदहरुमा चासो बढ्दै गएको छ। शाहको विपक्षमा रहेका एक सांसदले बैठकबारे सूचना पाएको र सहभागिताका लागि परामर्श भइरहेको बताएका छन्। आपसी परामर्शपछि बैठकमा सहभागी हुने र कसरी प्रस्तुत हुने भन्ने रणनीति तय गरिने बताए। शाहविरुद्धको मोर्चाबन्दीको नेतृत्व गरिरहेका सांसद दिवान सिंह विष्टले भने, शाहले संसदीय दलको विधानअनुसार चुनाव सामना गर्नुपर्ने बताउँदै आएका छन्।
