२३ जेठ, काठमाडौं । रुसी राष्ट्रपति भ्लादिमिर पुटिनले युक्रेनी राष्ट्रपति भोलोडिमिर जेलेन्स्कीको वार्ताको प्रस्ताव अस्वीकृत गरेका छन्। उनले जेलेन्स्कीको व्यवहारको पनि आलोचना गरेका छन्। सेन्ट पिटर्सबर्ग अन्तर्राष्ट्रिय आर्थिक मञ्चमा शुक्रबार भएको छलफलमा पुटिनले जेलेन्स्कीको पत्रमाथि आफ्नो प्रतिक्रिया दिएका थिए। जेलेन्स्कीले बिहीबार पुटिनलाई युद्धविरामका लागि भेटघाट गर्न आग्रह गर्दै पत्र लेखेका थिए। सो पत्रमा उनले पुटिनको उमेर, रूसको सङ्कटग्रस्त अर्थतन्त्र र बढ्दो सैन्य क्षतिको चर्चा गरेका थिए। उनले लेखेका थिए, “२६ वर्ष सत्तामा रहँदा उमेरले आफूमा प्रभाव पार्न थाल्छ। समयसँगै तपाईंमा निराशा झन् बढ्नेछ।”
पुटिनले उक्त आलोचनाको जवाफ दिँदै आफूलाई लिएर गरिएको टिप्पणीको विरोध गरे। उनले भने, ‘मेरो उमेरको कुरा उठाइएको छ। केही विश्व नेताहरू मभन्दा धेरै उमेरले जेठा छन्। सबैभन्दा महत्वपूर्ण कुरा त तपाईं आफ्नो काम कत्तिको दक्षतापूर्वक गर्न सक्नुहुन्छ भन्ने हो।’ पुटिनले वार्ता कहिल्यै अस्वीकार नगरेको दाबी गर्दै भने, वार्ताका लागि उपयुक्त तयारी आवश्यक छ। उनले गत वर्ष अलास्कामा अमेरिकी राष्ट्रपति डोनाल्ड ट्रम्पसँग भएको सहमतिलाई वार्ताका आधारका रूपमा प्रस्तुत गरे, जसअनुसार युक्रेनले डोनबास क्षेत्र छोड्नुपर्ने व्यवस्था रहेको छ। तर युक्रेनले उक्त सहमतिप्रति विरोध जनाउँदै पत्रमा लेखेको छ, ‘हामीले सुनेका छौं कि अलास्कामा तपाईंलाई युक्रेन र युरोपका केही विषय समाधान गर्ने आश्वासन दिइएको थियो। तर तपाईं बुझ्न सक्नुहुन्छ कि युक्रेनी र युरोपेली विषयहरूको निर्णय एन्कोरेजमा हुँदैन।’
क्रेमलिनले युक्रेनलाई आफ्ना चारवटा क्षेत्रबाट सेना फिर्ता ल्याउन आग्रह गर्दै आएको छ। पुटिनले भने युक्रेन मात्र वार्तामा इच्छुक छ र युक्रेनले रूसी आक्रमण रोक्नका लागि मात्र वार्ताको माग गरेको दाबी गरे। उनले आफ्ना सैनिकहरूलाई उत्प्रेरित गर्दै भने, ‘काम जारी राख।’ पुटिनका यी अभिव्यक्तिपछि जेलेन्स्कीले शुक्रबार साँझ विज्ञप्ति जारी गरे। विज्ञप्तिमा उनले रूसले पुनः युद्ध रोजेको बताएका छन्। उनले भनेका छन्, ‘दुर्भाग्यवश रूसले फेरि युद्ध अपनाएको छ। उनी यस युद्धलाई अन्त्य गर्न चाहँदैनन्। यस कमजोर प्रतिक्रियाले धेरैलाई निराश बनाउनेछ।’ जेलेन्स्कीले अब रूसमाथि थप आर्थिक दबाब बढाउनुपर्ने उल्लेख गरेका छन्। युक्रेनले रूसको युद्ध कोषलाई क्षति पुर्याउन त्यसका तेल रिफाइनरीहरूलाई निशाना बनाउँदै आएको छ।
सम्बन्धित खबर
