२३ जेठ, बागलुङ। ताराखोला गाउँपालिकामा निर्माणाधीन जलविद्युत् आयोजनास्थलमा काम गरिरहेका एक मजदुर फलामे पाइपले च्यापिएर ज्यान गुमाएका छन्। रोल्पा जिल्लाको सुनछहारी गाउँपालिका–३ का २० वर्षिया दिलबहादुर विक ताराखोला गाउँपालिका–५ धस्मरस्थित उक्त आयोजनामा कार्यरत थिए।
डोजरबाट खसेको पाइपले च्यापिएको कारण विक गम्भीर घाइते भएका थिए। उनलाई उपचारका लागि गलकोट नगरपालिका–३, हटियास्थित इमर्जेन्सी अस्पताल लगिएको थियो, जहाँ शनिबार दिउँसो उनको मृत्यु भएको जिल्ला प्रहरी कार्यालयका प्रमुख फणिन्द्रप्रसाद प्रसाईंले जानकारी दिएका छन्।
डोजर चालकलाई नियन्त्रणमा लिइएको छ भने विकको शव सोही अस्पतालमै राखिएको छ।
–रासस
