नवनियुक्त मन्त्री महावीर पुनले सरकारले तत्काल आवास उपलब्ध नगराएकोले आफू मन्त्रालयमै सुत्ने र बस्ने बताएका छन्। उनले भने, “यहीँ सुत्ने हो। यहीँ बस्ने हो। सरकारले क्वार्टर दियो भने जाने हो।” उनले आफू बढीमा तीन वर्ष मात्र मन्त्री पदमा बसेर काम गर्ने र बाँकी समय युवालाई सुम्पिने बताएका छन्। २६ जेठ, काठमाडौं।
मंगलबार पद ग्रहण गर्ने समारोहपछि सञ्चारकर्मीहरूसँग कुरा गर्दै उनले भने, “अहिले सरकारी क्वार्टर तुरुन्त दिन सकिने अवस्था छैन, त्यो मलाई थाहा छ। क्वार्टरको तुलनामा यहीँ बस्न पाउँदा खुशी लाग्छ। जोश र जाँगरले काम गर्छु। नभए आराम गर्छु र फेरि उठेर काम गर्छु। मेरो तरिका यही हो।” उनले आफू पाँच वर्षसम्म मन्त्री पदमा नबस्ने बताए।
उनले भने, “अब प्रधानमन्त्रीज्यू र जनतालाई भन्न चाहन्छु – म धेरै समय बस्दिनँ। बढीमा तीन वर्ष मन्त्री पदमा रहनेछु। तीन वर्षभित्र पाँच/छ वर्षका काम पूरा गरेर राम्रो आधार तयार गरिसकेपछि युवालाई जिम्मा दिनेछु। मुलुक विकास गर्ने भनेको युवालाई अवसर दिनु हो।” उनले हाँस्दै भने, “म पनि ७२ वर्षको युवा हुँ र जोश जाँगरका कारण आफूलाई ३० वर्षको भन्दा बढी उर्जा भएको ठान्दछु।”
सम्बन्धित खबर
