नेपाल राष्ट्र बैंकका अनुसार गत वर्ष वैशाखमा २.७७ प्रतिशत रहेको वार्षिक बिन्दुगत उपभोक्ता मुद्रास्फीति चालु आर्थिक वर्षको सोही अवधिमा ५.०४ प्रतिशत पुगेको छ। समीक्षा अवधिमा खाद्य तथा पेय पदार्थ समूहको मुद्रास्फीति ४.६३ प्रतिशत र गैरखाद्य तथा सेवा समूहको मूल्यवृद्धि ५.२६ प्रतिशत पुगेको छ। नेपालमा उपभोक्ता मुद्रास्फीति ५.०४ प्रतिशत पुगेको छ भने छिमेकी मुलुक भारतको मुद्रास्फीति ३.४८ प्रतिशतमा सीमित रहेको छ। २६ जेठ, काठमाडौं।
गत वर्ष वैशाखमा २.७७ प्रतिशतमा सीमित वार्षिक बिन्दुगत उपभोक्ता मुद्रास्फीति चालु आर्थिक वर्ष सोही अवधिमा झन्डै दोब्बर बढेर ५.०४ प्रतिशत पुगेको छ। नेपाल राष्ट्र बैंकले सार्वजनिक गरेको २०८३ वैशाखको वर्तमान आर्थिक तथा वित्तीय स्थिति अनुसार अघिल्लो वर्षको तुलनामा यस वर्ष महँगी दरमा उल्लेख्य वृद्धि देखिएको हो। खाद्य तथा पेय पदार्थ समूहको मुद्रास्फीति ४.६३ प्रतिशत र गैरखाद्य तथा सेवा समूहको ५.२६ प्रतिशत छ।
फलफूल र यातायातमा उच्च मूल्यवृद्धि खाद्य समूह अन्तर्गत फलफूल मूल्यमा १८.६० प्रतिशतको उच्च वृद्धि देखिएको छ। यस्तै घिउ तथा तेल १३.९९, तरकारी ५.४० र माछामासुको मूल्य ४.१६ प्रतिशत बढेको छ। राहतको कुरा भने दाल तथा गेडागुडीको मूल्य १.६७ र मरमसलाको मूल्य ०.६५ प्रतिशतले घटेको छ। गैरखाद्य तथा सेवा समूहमा विविध वस्तु तथा सेवाको मूल्य १९.९० प्रतिशत र यातायात भाडा दर १५.३० प्रतिशत बढेको छ।
भौगोलिक आधारमा विश्लेषण गर्दा वैशाखमा तराई क्षेत्रमा सबैभन्दा बढी ५.५९ प्रतिशत मुद्रास्फीति छ। काठमाडौं उपत्यकामा ४.९०, पहाड ४.७३ र हिमालमा ३.७३ प्रतिशत मुद्रास्फीति छ। यस्तै ग्रामीण क्षेत्रको तुलनामा सहरी क्षेत्रमा महँगी बढी देखिएको छ। ग्रामीण क्षेत्रमा ४.३५ प्रतिशत मूल्यवृद्धि हुँदा सहरी क्षेत्रमा ५.२९ प्रतिशत पुगेको छ। प्रदेशगत हेर्दा कोशीमा सबैभन्दा बढी ५.६४ प्रतिशत र बागमतीमा सबैभन्दा कम ४.५५ प्रतिशत मुद्रास्फीति रहेको राष्ट्र बैंकको तथ्यांक छ।
