२७ जेठ, काठमाडौं । सुशील केडियाको नेतृत्वमा विश्व भारती विद्यालय (डीएभी) ले लगातार दोस्रोपटक एसियन ई–लर्निङ ‘जयकुमारनाथ शाह स्मृति’ इन्टरस्कुल यू–१६ क्रिकेट प्रतियोगिताको उपाधि जितेको छ । मुलपानी क्रिकेट मैदानमा वर्षाले प्रभावित फाइनल खेलमा डीएभीले नेपाल पुलिस स्कूललाई डिएलएस पद्धतिमा ७ विकेटले पराजित गर्दै उपाधि हात पारेको हो । उपाधिसँगै डीएभीले १ लाख ५० हजार रुपैयाँ नगद पुरस्कार प्राप्त गर्यो भने उपविजेता नेपाल पुलिस स्कूलले ७५ हजार रुपैयाँ पुरस्कार पाए ।
डीएभीले प्रतियोगिताको दोस्रो संस्करणमा पनि उपाधि जितेको थियो । पुलिस स्कूलले तोकेको १०२ रनको लक्ष्य पछ्याएको डीएभीले ४.१ ओभरमा २ विकेट गुमाएर १७ रन बनाएको अवस्थामा वर्षाका कारण खेल रोकिएको थियो । पछि बुधबार खेललाई १२ ओवरमा सीमित गर्दै डिएलएस विधिअनुसार डीएभीलाई ७० रनको लक्ष्य दिइयो । डीएभीले १०.५ ओवरमा ३ विकेट गुमाएर उक्त लक्ष्य पूरा गर्दै लगातार दोस्रोपटक च्याम्पियन बन्न सफल भयो।
डीएभीको जितमा आरुष झाले ३० बलमा ३ चौकासहित अविजित २६ रन बनाए । विराट जैसवालले २३ बलमा २२ रन जोडे भने प्रसिद्ध जैशीले ६ रन बनाए । सत्यम बस्नेत २ रनमा आउट हुँदा कमल शाही ३ रनमा अविजित रहे। कमल शाही ‘पिक पोइन्ट प्लेयर अफ द म्याच’ घोषित भए । पुलिस स्कूलका प्रियान्शुकिशोर राउत र सुनिल ठाकुरले समान १–१ विकेट लिए । अघिल्लो दिन मंगलबार टस जितेर पहिले ब्याटिङ गरेको नेपाल पुलिस स्कूलले निर्धारित २० ओभरमा ८ विकेट गुमाएर १०१ रन बनाएको थियो ।
पुलिसका मोहम्मद अब्बास साफीले अविजित ३३ रन बनाए भने श्याम बाबु ठाकुरले १२ र आशुतोष मिश्रले १० रन योगदान दिए । डीएभीका कमल शाहीले ४ ओभरमा मात्र ११ रन खर्चेर ४ विकेट लिए। कुञ्जन आचार्य र प्रसिद्ध जैशीले समान २-२ विकेट हात पारे । काठमाडौं जिल्ला क्रिकेट संघले आयोजना गरेको प्रतियोगिता जेठ १९ गतेदेखि सुरु भएको थियो र यसमा कुल २४ टोली सहभागी थिए।
प्रतियोगिताको उदीयमान खेलाडी जेम्स स्कूलका स्वराज चौलागाईं घोषित भए । उनले प्रतियोगिताभर १०३ रन बनाउनुका साथै १२ विकेट लिएका थिए। उनलाई नगद ५ हजार रुपैयाँसहित ‘लकर रुम’को तर्फबाट विशेष उपहार दिइयो । सैनिक आवासीय महाविद्यालयका राजदीप आचार्य उत्कृष्ट ब्याट्समन घोषित भए। उनले ४ खेलमा २३९ रन बनाए। नगद ५ हजार रुपैयाँसहित ‘लकर रुम’को तर्फबाट ब्याट र ‘डार्क फेन्टासी’को तर्फबाट विशेष उपहार पाए ।
डीएभीका कुञ्जन आचार्य १३ विकेट सहित उत्कृष्ट बलर घोषित भए। सर्वोत्कृष्ट खेलाडी डीएभीका प्रसिद्ध जैशी घोषित भए जसले २७३ रन र ७ विकेट लिएर टोलीलाई उपाधि दिलाउन महत्वपूर्ण भूमिका खेले। उनले नगद १० हजार रुपैयाँसहित ‘लकर रुम’को तर्फबाट क्रिकेट किट ब्याग प्राप्त गरे। विधागत उत्कृष्ट खेलाडीहरूलाई पनि आकर्षक उपहार दिइयो । समापन समारोहमा मुख्य प्रायोजक एसियन ई–लर्निङ प्रालिकी निर्देशक मीना लिम्बू त्रिपाठी प्रमुख अतिथि थिए। नेपाल क्रिकेट संघ (क्यान) का सचिव पारस खड्का विशेष अतिथि र ई–सेवाका ब्रान्ड अफिसर बिमोम डंगोल लगायत विशिष्ट अतिथिहरू उपस्थित थिए। कार्यक्रमको अध्यक्षता काठमाडौं जिल्ला क्रिकेट संघका अध्यक्ष दिवाकर घलेले गरे।
समापन समारोहको सम्बोधन गर्दै प्रमुख अतिथि त्रिपाठीले सफल आयोजकहरूलाई धन्यवाद दिँदै आगामी दिनमा प्रायोजन निरन्तरता दिने प्रतिबद्धता व्यक्त गरिन्। साथै सहभागी सबै टोली, खेलाडी, प्रशिक्षक तथा अभिभावकलाई बधाई तथा धन्यवाद व्यक्त गरिन्। काठमाडौं जिल्ला क्रिकेट संघका अध्यक्ष दिवाकर घलेले प्रतियोगिताको सफल आयोजनामा सहयोग गर्ने मुख्य प्रायोजक, सहयोजक संस्था, अफिसियल र सबै अतिथिलाई धन्यवाद दिए। उनले विद्यालयस्तर क्रिकेट विकासका लागि यस्ता प्रतियोगितालाई आगामी दिनमा निरन्तरता दिने प्रतिबद्धता व्यक्त गरे।
