२७ जेठ, काठमाडौं । नेपाली महिला क्रिकेट टोलीले एसिया कप क्रिकेट प्रतियोगिताको लागि छनोट नपाएको छ। केही दिन अगाडि सम्पन्न एसियन गेम्स छनोटमा पनि असफल बनेको यो टोलीले यस पटक पनि एसिया कपमा स्थान बनाउन सकेन। मलेसियामा भइरहेको एसीसी महिला प्रिमियर कपको क्वार्टरफाइनलमा थाइल्यान्डसँग पराजित भएपछि नेपाल एसिया कप छनोटबाट बाहिरियो।
बुधबार विहान भएको क्वार्टरफाइनल खेलमा नेपाल ५६ रनले थाइल्यान्डसँग पराजित भयो। थाइल्यान्डले तोकेको १३१ रनको लक्ष्य पछ्याएको नेपालले २० ओभरमा ७ विकेट गुमाउँदै मात्र ७४ रन बनाउन सफल भयो। नेपालका लागि रुबिना क्षेत्रीले सर्वाधिक अविजित २० रनको योगदान दिइन्। सोनी पाख्रिनले १५, सीता रानामगरले १२ र सम्झना खड्काले ११ रन बनाइन्। अन्य ब्याट्सम्यानले दोहोरो अंक पुरा गर्न सकेनन्।
थाइल्यान्डका थिपात्चा पुथावङले ४ ओभरमा ७ रन खर्चेर २ विकेट लिए भने सुनिदा चतुरोङरतना र सुलिपर्न लाओमीले समान रूपमा २-२ विकेट लिएका थिए। फनिता मायाले पनि १ विकेट लिए। पहिले ब्याटिङ गरेको थाइल्यान्डले २० ओभरमा ४ विकेट गुमाएर १३० रन बनाएको थियो। थाइल्यान्डकी नानापत कोन्चारोन्काइले अर्धशतकीय पारी खेल्दै ५१ बलमा अविजित ६३ रन बनाइन्। फनिता मायाले २६ र चनिदा सुथिराङले १६ रन जोडे। नेपालका कविता कुँवर, रिया शर्मा र रुबिना क्षेत्रीले समान रूपमा १-१ विकेट लिए।
नेपाली महिला टोली गत साता सम्पन्न एसियन गेम्स छनोटको निर्णायक खेलमा चीनसँग पराजित भई एसियन गेम्सका लागि छनोट नपाएको थियो।
सम्बन्धित खबर
