फिफा विश्वकप २०२६: मेक्सिको र दक्षिण अफ्रिकाबीच पहिलो खेलमा तीन ‘रेड कार्ड’, के रेफरीहरूको कडाइको संकेत हो?

धेरैलाई विश्वकपका खेलहरूमा ‘रेड कार्ड’ कम देखिन थालिसकेको जस्तो लागेको थियो। तर बिहीवार फिफा विश्वकप २०२६ को पहिलो खेलमा रेफरीले तीनपटक रेड कार्ड देखाए। मेक्सिको सिटीमा आयोजना गरिएको समूह ‘ए’ अन्तर्गतको खेलमा आयोजक राष्ट्र मेक्सिकोले दक्षिण अफ्रिकालाई २-० ले पराजित गर्‍यो। रेफरीले सुरुमा दक्षिण अफ्रिकाका याया सिट्होल र टेम्बा ज्वानेलाई, अनि त्यसपछि मेक्सिकोका सीजर मोन्टेसलाई खेलको अन्तिम क्षणमा मैदानबाट बाहिर पठाए।

हामीलाई रेफरीहरूको नम्र व्यवहार र स्वभाव देख्ने बानी परिसकेको हुन सक्छ। रुस र कतारमा आयोजना भएका विगतका दुइ वटा विश्वकपमा सम्पूर्ण प्रतियोगितामा मात्र चार-चारवटा रेड कार्ड देखाइएको थियो। तर बीस वर्षपछि यस पटक एउटै खेलमा तीन खेलाडी त्यस्तो कारबाहीमा परे। सन् २००६ को विश्वकपमा पूरा प्रतियोगितामा कुल २८ खेलाडीले रेड कार्ड पाएका थिए। त्यस प्रतियोगितामा तीनवटा खेलमा तीन-तीन खेलाडीले रेड कार्ड पाए भने पोर्चुगल र नेदरल्यान्ड्सको खेलमा अहिलेसम्मकै सर्वाधिक चार खेलाडीले रेड कार्ड पाएका थिए।

फिफाले सन् २०१७ मा प्येर्ल्वीजि कोलिनालाई नयाँ मुख्य रेफरी नियुक्त गर्‍यो। त्यसपछि नयाँ युगको शुरुवात भयो। कोलिनाले रेफरीले गर्ने निर्णयहरूले दुवै टोलीलाई न्याय हुनुपर्ने कुरामा जोड दिएका छन्। रेड कार्ड पाउनुपर्ने गतिविधि नगरेसम्म खेलाडीहरू मैदानमै रहनुपर्छ। उदाहरणका लागि उनको कार्यकालमा गोल गर्दै गरेको सुनिश्चित अवसरलाई फाउल गरेर रोक्दा (Dogso – डग्सो) को नियम केही खुकुलो बनाइएको छ। अब त्यस्तो अवस्थामा रेफरीले पेनाल्टी दिन्छ भने तत्कालै रेड कार्ड दिँदैन।

प्रतियोगिताका प्रारम्भमा रेफरीहरूको निर्णयशैलीको आधारमा प्रायः पछि हुने खेलहरूका लागि एउटा ढाँचा बनिरहेको देखिन्छ। यो पहिलो खेलले त्यस्तो सङ्केत गरेको निष्कर्ष निकाल्नु कत्तिको उचित होला? प्रतियोगिता सुरु हुनुभन्दा अगाडि गरिएको ब्रीफिङमा कोलिनाले समय फजुल गर्ने प्रवृत्ति र खेलाडीहरूको व्यवहारमा आफूले विशेष ध्यान केन्द्रित गरेको बताएका थिए।