३० जेठ, काठमाडौं । भारतको असम प्रदेशमा भारतीय वायु सेनाको मालवाहक विमान दुर्घटना भएको छ । असमको जोरहाट एयर फोर्स स्टेशनमा शनिबार वायु सेनाको एएन–३२ ट्रान्सपोर्ट एयरक्राफ्ट दुर्घटनामा परेको हो । वायु सेनाका प्रवक्ता विंग कमान्डर जयदीपलाई उद्धृत गर्दै समाचारमा भनिएको छ, ‘जोरहाट एयर फोर्स स्टेशनमा एएन–३२ विमान दुर्घटनाग्रस्त भएको छ । तर, अहिले घटनाको विस्तृत जानकारी संकलन गर्दैछौं ।’
दुर्घटनाबारे भारतीय वायु सेनाले सामाजिक सञ्जाल ‘एक्स’ मार्फत जानकारी गराएको छ कि जोरहाटमा अवतरणका क्रममा विमान दुर्घटना भएको र सो दुर्घटनाको कारण पत्ता लगाउन ‘कोर्ट अफ इन्क्वायरी’ गठन गरिनेछ । दुर्घटनामा परेको विमानमा आगो लागेको छ । दुर्घटनाबाट कुनै हताहती भएको छ कि छैन भन्ने तथ्याङ्क अहिलेसम्म सार्वजनिक गरिएको छैन।
