काठमाडौँमा सम्पन्न भएको नवौँ राष्ट्रिय स्केटबोर्ड प्रतियोगिता सफलतापूर्वक सम्पन्न भएको छ। यस प्रतियोगितामा विजेता खेलाडीहरूलाई पुरस्कार वितरण गरिएको छ। पुरुष सिनियरतर्फ शरदकुमार राई र महिलातर्फ खुसी विक प्रथम स्थानमा रहे। खेलकुद मन्त्री सस्मित पोखरेलले खुला सार्वजनिक जग्गामा खेलमैदान बनाएर स्केटबोर्ड सहितका खेलहरूको विकासका लागि सरकार प्रतिवद्ध रहेको जानकारी दिनुभयो। ३१ जेठ, काठमाडौँ। नेपाल स्केटिङ तथा स्केटबोर्डिङ संघको आयोजनामा नवौँ राष्ट्रिय स्केटबोर्ड प्रतियोगिता २०८३ आइतबार काठमाडौँमा सम्पन्न भएको हो। शनिबारदेखि सुरु भएको प्रतियोगिताका विजेताहरुलाई आइतबार साँझ राष्ट्रिय खेलकुद परिषद (राखेप) का सदस्य सचिव रामचरित्र मेहताले नगद पुरस्कार, शिल्ड, पदक र प्रमाणपत्र वितरण गरेका थिए।
प्रतियोगितामा पुरुष सिनियरतर्फ शरदकुमार राई पहिलो, विजय लिम्बु दोस्रो र विजय गुरुंग तेस्रो स्थानमा रहे। महिलातर्फ खुसी विक प्रथम, समिक्षा राई दोस्रो र समिरा रानामगर तेस्रो भएकी छिन्। यस्तै, पुरुष जुनियरतर्फ अंकित विक पहिलो, अभिषेश परियार दोस्रो र सन्देश नेपाली तेस्रो स्थानमा रहेका थिए। पुरुष र महिला सिनियरतर्फ प्रथम, द्वितीय र तृतीय स्थानका खेलाडीहरू क्रमशः ३० हजार, २० हजार र १५ हजार रुपैयाँ नगद पुरस्कार प्राप्त गरे। जुनियर पुरुष र महिला समूहका खेलाडीहरूका लागि क्रमशः १५ हजार, १० हजार तथा ५ हजार रुपैयाँ नगद पुरस्कार दिइएको थियो। प्रतियोगितामा देशभरबाट १५० पुरुष र १०० महिला खेलाडीहरूले सहभागिता जनाएका थिए।
दुई दिने प्रतियोगितामा पहिलो दिन शनिबार छनोट चरण सम्पन्न भयो भने आइतबार दोस्रो दिन उत्कृष्ट खेलाडीहरूबीच प्रतिस्पर्धा भएको थियो। आइतबार विहान उद्घाटन समारोहमा शिक्षा तथा खेलकुद मन्त्री सस्मित पोखरेलले एमबुद्ध पार्कको निर्माणले स्केटिङ र स्केटबोर्डिङ खेललाई नयाँ उचाइमा पुर्याउन मद्दत पुग्ने बताउनुभयो। मन्त्री पोखरेलले भन्नुभयो, “खुला सार्वजनिक जग्गामा यस्ता स्केटबोर्ड लगायतका खेलका लागि खेलमैदान निर्माण गरी खेलको विकासका लागि सरकार प्रतिबद्ध छ।” काठमाडौँ महानगरपालिकाको वडा नं ५ हाँडीगाउँ पहेलो पुल नजिक निर्माण भइरहेको एमबुद्ध पार्कको बारेमा उल्लेख गर्दै मन्त्रीले यसको सुरक्षित र सदुपयोगको अपिल गर्नुभयो। पुरस्कार वितरण कार्यक्रममा राखेपका सदस्य सचिव रामचरित्र मेहताले सरकारले सबै खेलहरूको विकास विस्तार गर्ने र खेलाडीहरूका समस्याहरू सुन्ने नीति लिएको जानकारी दिनुभयो। उहाँले स्केटिङ खेलका लागि पूर्वाधार विकास भइरहनु पनि खेलाडी र खेलको समग्र विकासका लागि सहयोगी रहेको उल्लेख गर्नुभयो। यस अघि राष्ट्रिय स्केटबोर्ड प्रतियोगिता विराटनगर, बुटवल, पोखरा र काठमाडौँमा समेत आयोजना भइसकेको छ। उद्घाटन र पुरस्कार वितरण कार्यक्रम संघका अध्यक्ष अच्युत खनालको अध्यक्षतामा सम्पन्न भएको थियो।
