जर्मनीले डेब्युटान्ट कुरासाओमाथि ७–१ गोलको फराकिलो जित हात पारे

जर्मनीले फिफा विश्वकप २०२६ को पहिलो खेलमा डेब्युटान्ट कुरासाओलाई ७–१ को फराकिलो गोल अन्तरले पराजित गरेको छ। पहिलो पटक विश्वकप खेलिरहेको कुरासाओका लागि लिभानो कोमेनेन्सियाले पूर्व विजेता जर्मनीविरुद्ध ऐतिहासिक पहिलो गोल गरे। जर्मनीले पहिलो हाफमा तीन र दोस्रो हाफमा चार गोल तुल्याएको छ।

३१ जेठ, काठमाडौं। चार पटकको विश्व विजेता जर्मनीले फिफा विश्वकप २०२६ को पहिलो खेलमा डेब्युटान्ट कुरासाओलाई ७-१ ले सहजै पराजित गरेको छ। अमेरिकाको ह्युस्टन स्टेडियममा भएको समूह ई को खेलमा क्यारेबियन राष्ट्र कुरासाओले विश्वकपमा डेब्यु गर्दागर्दै पूर्व च्याम्पियन विरुद्ध गोलको खाता खोल्न सफल भए पनि गोलको वर्षा रोक्न सकेन।

जर्मनीका लागि काई हाभार्ट्जले दुई गोल गरे भने फेलिक्स एनमेचा, निको स्लोटरबेक, जमाल मुसिएला, नाथनियल ब्राउन, र डेनिज उन्डाभले एक-एक गोल गरे। कप्तान जोसुआ किम्मिचले दुई असिस्ट प्रदान गरे। एनमेचाले छैटौं मिनेटमै गोल गर्दै जर्मनीलाई अग्रता दिलाएका थिए। जर्मनीले सुरुवाती अग्रता लिएपछि कुरासाओमाथि लगातार दबाब बनाएको थियो।

तर कुरासाओका लिभानो कोमेनेन्सियाले २१औं मिनेटमा गोल गर्दै खेललाई १-१ को बराबरीमा पुर्‍याए। पहिलो पटक विश्वकप खेलिरहेको कुरासाओले विश्वकपको डेब्युमै चार पटकको विश्व विजेता जर्मनीविरुद्ध ऐतिहासिक गोल गरेको हो। जर्मनीले अब अर्को खेलमा आइभरी कोष्टसँग खेल्नेछ भने कुरासाओले इक्वेडरसँग प्रतिस्पर्धा गर्नेछ।