कैलालीको गोदावरीमा वन अतिक्रमण हटाउने क्रममा टेम्पो भिरबाट खसालिएको घटनामा प्रहरीले १० जना वन कर्मचारीलाई सोधपुछका लागि नियन्त्रणमा लिएको छ। भीमदत्त राजमार्ग क्षेत्रमा धनादेवी धामीले खुद्रा पसलको रूपमा प्रयोग गरेको टेम्पो वन कर्मचारीहरूद्वारा भिरबाट खसालिएको भिडियो सामाजिक सञ्जालमा भाइरल भएको थियो। डिभिजन वन कार्यालय धनगढीले भने सडक छेउको छाप्रो हटाउने क्रममा सन्तुलनमा समस्या आएपछि कवाड भइसकेको टेम्पो भिरबाट खसेको दावी गरेको छ।
३१ जेठ, धनगढी। कैलालीको गोदावरी नगरपालिका–४ स्थित गाईबाँधेमा वन अतिक्रमण हटाउने क्रममा सडकबाट टेम्पो भिरमा खसालिएको घटनामा प्रहरीले १० जना वन कर्मचारीलाई नियन्त्रणमा लिएको छ। जिल्ला प्रहरी कार्यालय कैलालीले ६ जना र इलाका प्रहरी कार्यालय मालाखेतीले चार जना गरी जम्मा १० जना वन कर्मचारीलाई नियन्त्रणमा लिएको छ। जिल्ला प्रहरी कार्यालयका प्रहरी निरीक्षक लोकराज जोशीका अनुसार सोधपुछका लागि वन कर्मचारीहरूलाई नियन्त्रणमा लिइएको हो।
उनका अनुसार, गाईबाँधेमा महिलाले खुद्रा सामान बिक्री गर्न प्रयोग गर्दै आएको टेम्पो भिरबाट खसाल्ने घटनामा संलग्न वन कर्मचारीहरूको पहिचान गर्ने प्रयास भइरहेको छ। भीमदत्त राजमार्ग क्षेत्रको वन अतिक्रमण हटाउने क्रममा शुक्रबार गाईबाँधेमा धनादेवी धामीले खुद्रा पसलको लागि प्रयोग गरेको टेम्पो वन कर्मचारी र वन रक्षकहरूले भिरबाट खसालेको भिडियो सामाजिक सञ्जालमा भाइरल भएको थियो। डिभिजन वन कार्यालय धनगढीले आइतबार बिहान पत्रकार सम्मेलन गर्दै उक्त टेम्पो कवाड भइसकेको र छाप्रोका रूपमा सडक छेउमा राखिएको जनाएको छ। विगतदेखि नै छाप्रो हटाउन अवरोध हुने भएकाले शुक्रबार बल प्रयोग गरी हटाउने क्रियाकलापका क्रममा भिरालो भूगोल र सन्तुलनमा समस्या आएपछि टेम्पो भिरबाट खसेको दाबी वन कार्यालयले गरेको हो।
