ताप्लेजुङको आठराई त्रिवेणी गाउँपालिकामा आगामी असार १२ र १३ गते पहिलोपटक प्रदेशस्तरीय अलैँची महोत्सव आयोजना हुँदैछ। अलैँची प्रवर्द्धन गर्ने उद्देश्यले आयोजना गरिने यस महोत्सवमा बोटबिरुवा प्रदर्शनी, किसान कार्यशाला र व्यवसायीहरूबीच अन्तरक्रियाका कार्यक्रमहरू रहनेछन्। ताप्लेजुङमा मुख्य नगदेबालीको रूपमा रहेको अलैँची करिब ३ हजार ७०० हेक्टर क्षेत्रफलमा खेती गरिँदै आएको छ।
महोत्सव मूल समारोह समितिका संयोजक बालचन्द्र आङ्बुहाङका अनुसार, आठराई त्रिवेणी गाउँपालिका र कृषि ज्ञान केन्द्र ताप्लेजुङको आर्थिक सहयोगमा आयोजना हुन लागेको यस महोत्सवमा अलैँचीका बोटबिरुवा तथा फलफूल प्रदर्शनी, अलैँचीबाट बनेका खाद्य पदार्थहरू, साथै स्थानीय उत्कृष्ट अलैँची बगानको प्रदर्शनी र अवलोकनसमेत गरिनेछ।
महोत्सवमा अलैँची किसान कार्यशाला, अलैँची व्यवसायी र खरिदकर्ता तथा विक्रेताबीच अन्तरक्रिया, अलैँची विज्ञ टोलीबीच आधुनिक खेती र बजार विस्तारसम्बन्धी छलफलका कार्यक्रमहरू पनि रहनेछन् भनी आङ्बुहाङले जानकारी दिए। ताप्लेजुङमा अलैँची प्रमुख नगदेबालीको रूपमा महत्त्वपूर्ण भूमिका निर्वाह गर्दै आएको छ।
