स्कटल्यान्डका समर्थकहरूले २८ वर्षपछि विश्वकपमा आफ्नो टोलीले खेलेको दृश्य देख्न पाए। विश्वकप २०२६ मा आफ्नो राष्ट्रको पहिलो खेल करिब तीन मिनेट ढिलो सुरु हुँदा पनि उनीहरूलाई खासै असन्तुष्टि नदेखिएको हुनुपर्छ। सन् १९९० मा इटलीमा भएको विश्वकपपछि स्कटल्यान्डले पहिलोपटक यहि खेलमा जित दर्ता गर्यो। हेइटीलाई १-० ले पराजित गरेपछि ‘टार्टन आर्मी’ ले लामो प्रतीक्षा गरिए पनि त्यस फल वास्तवमै मधुर हुन्छ भन्ने अनुभूत गर्न सक्छन्। यद्यपि, म्यासचूसिट्समा सम्पन्न समूह ‘सी’ को खेलमा भएको विलम्ब निरन्तर जारी प्रतियोगिताको चलन बनेको छ, जहाँ खेलहरू तोकिएको समयमा सुरु हुँदैनन्।
संयुक्त राज्य अमेरिका, मेक्सिको र क्यानडाले संयुक्त रूपमा आयोजना गरेको विश्वकप २०२६ का प्रारम्भिक आठ खेलहरूमध्ये कुनै पनि खेल तोकिएको समयमा सुरू भएन। ती खेलहरू औसतमा निर्धारित समयभन्दा तीन मिनेट ढिला शुरू भए। गत साता बिहीवार मेक्सिको र दक्षिण अफ्रिकाबीचको पहिलो खेल छ मिनेट विलम्ब भयो। शनिबार कतार र स्विट्जरल्यान्डबीचको खेल पनि तोकिएको समयभन्दा लगभग पाँच मिनेटपछि सुरु भयो। तोकिएको समयभन्दा एक मिनेटभित्र मात्र अस्ट्रेलिया र टर्कीबीच तथा दक्षिण कोरिया र चेक रिपब्लिकबीचका खेलहरू सुरु भएका थिए।
फिफाले खेल सुरु हुनु अघि स-साना विवरणहरू ध्यानमा राखेर सावधानीपूर्वक योजना बनाएको छ। प्रत्येक खेललाई कति बेला के गर्नुपर्छ भनी छुट्टै तालिका तयार गरिएको छ। यस्तो ‘रनिङ अर्डर’ सञ्चारमाध्यमलाई समेत उपलब्ध गराइन्छ। यसमा अन्य महत्वपूर्ण विवरणहरुका साथै टोलीहरू र खेलका अधिकारिक व्यक्तिहरू कुन समयमा ‘टनल’ मा उपस्थित हुने, कति बेला मैदान प्रवेश गर्ने, र राष्ट्रिय गान बजाउने जस्ता सबै कार्यहरूका लागि स्पष्ट समय निर्धारण गरिएको हुन्छ।
तर, खेल सुरु हुनु अघि हुने भव्य कार्यक्रममा फिफाको निर्णयले पनि समस्या उत्पन्न गरेको हुन सक्छ। राष्ट्रिय गान बजाउन खेलाडीहरू मात्र नभई टोलीका सबै सदस्य मैदानको बीचभागमा उपस्थित हुन्छन् र मैदानका दुई भागमा ठूला झण्डा प्रदर्शन गरिन्छ। विश्व फुटबलको सर्वोच्च निकाय फिफाले यस्तो समारोहलाई “एकता, गौरव र भावनाको क्षण”को रूपमा हेर्छ।
