भारतको सडकबाट बौद्ध भिक्षुहरूसँगै विश्व शान्ति यात्रामा निस्किएको ‘अलोका द पिस डग’ नामक कुकुर नेपाल आइपुगेको छ। द पिस डग अर्थात् अलोका अहिले विश्वभर प्रसिद्ध छ। कुनैबेला भारतको सडकमा बेवारिसे अवस्थामा रहेको यो कुकुर अहिले बौद्ध भिक्षुहरूसँगै विश्व शान्ति पदयात्रामा छ। अमेरिका, श्रीलंका, भारत हुँदै अहिले अलोका नेपाल आइपुगेको हो। अलोका बुद्ध एयरमार्फत लुम्बिनीबाट काठमाडौं आएको हो। बुद्ध एयरले आफ्नो आधिकारिक फेसबुक पेजमा अलोकालाई स्वागत गर्न पाउँदा अत्यन्त हर्षित भएको उल्लेख गरेको छ। फेसबुकमार्फत उनले लेखेका छन्– बौद्ध भिक्षु ‘थिच् मिन्ह तुए’ को नेपालमा अर्थपूर्ण बसाइ र हजारौं किलोमिटर लामो उनको शान्ति यात्राको निरन्तर सफलताका लागि हार्दिक शुभकामना व्यक्त गर्दछौं। बुद्ध एयरको तर्फबाट हामी उनलाई, ‘अलोका द पीस डग’ र उनका साथीहरूलाई भैरहवा–काठमाडौं उडानमा स्वागत गर्न पाउँदा अत्यन्त हर्षित छौं।
अमेरिकामा १९ जना बौद्ध भिक्षुहरूले सुरु गरेको २३०० माइल लामो पैदल यात्रामा अलोका पनि सहभागी थियो। त्यही यात्राबाट अलोकाले सबैको ध्यान आफूतिर केन्द्रित गराएको छ। भारतको सडक कुकुर, जो विश्व शान्तिको सन्देश वाहक बनेको छ, अलोका एक साधारण कुकुर हो। हिजोसम्म ऊ सडकमा थियो। भोक, पीडा, त्रासदी सहेर अरू सडक कुकुरजस्तै उसका चिसा रातहरू बित्थे। उपेक्षा र असुरक्षाले उसलाई सताइरहन्थ्यो। उसको हरेक पल अनिश्चित थियो। अलोकाको कथा भारतबाट सुरु हुन्छ। त्यसबेला अलोका लगभग ४ वर्षको थियो। बौद्ध भिक्षुहरू पैदल यात्रा गरिरहेको बेला यो कुकुर स्वतःस्फूर्त रूपमा उनीहरूको टोलीमा मिसियो। अलोकालाई कुनै प्रशिक्षण दिइएको थिएन। न कसैले उनलाई डोहोर्याएको थियो। ऊ आफैंले भिक्षुहरूको संगत रोजेको थियो। भिक्षुहरूसँगै हिँड्न थालेपछि उनीहरूले यसलाई ‘अलोका’ नाम दिए। यसको अर्थ संस्कृतमा ‘प्रकाश’ वा ‘शान्ति’ हुन्छ।
