२ असार, काठमाडौं । सूर्य नेपाल गल्फ टुर २०२५-२६ अन्तर्गत सिजनको अन्तिम प्रतियोगिता सूर्य नेपाल प्रिमियर गल्फ च्याम्पियनसिपको पहिलो दिन भुवन नगरकोटी ९-अन्डर ६३ को उत्कृष्ट स्कोरसहित शीर्ष स्थानमा रहेका छन्। पहिलो राउन्डको समाप्तिमा भुवनले तीन एमेच्योर गल्फरहरू सदभाव आचार्य, तेन्जिङ छिरिङ र नोर्बु छिरिङ शेर्पालाई ४ स्ट्रोकले पछि पारेका छन्। ५-अन्डर ६७ स्कोर गरेका सदभाव, तेन्जिङ र नोर्बु संयुक्त रूपमा दोस्रो स्थानमा छन्। ४-अन्डर ६८ को स्कोरसहित शुक्र बहादुर राई र तोरण विक्रम शाहीले पाँचौं स्थान बाँडेका छन्। यस्तै ३-अन्डर ६९ स्कोरमा एमेच्योर वाङचेन ढोन्डुप तथा प्रोफेसनल खेलाडी निरज तामाङ, भुवन कुमार रोक्का, सुबाश तामाङ र दिनेश प्रजापतिले संयुक्त रूपमा सातौं स्थान लिएका छन्। साबिक विजेता एमेच्योर गल्फर राहुल विश्वकर्मा २-अन्डर ७० सहित १२औं स्थानमा र धन बहादुर थापा १-अन्डर ७१ सहित १३औं स्थानमा छन्।
भुवनले उत्कृष्ट प्रदर्शन गर्दै बोगी रहित कार्ड तयार पारेका छन्। पहिलो, तेस्रो र सातौं होलमा बर्डी प्रहार गर्दै फ्रन्ट नाइन ३-अन्डर ३३ मा समाप्त गरेका थिए। त्यसपछि उनले ११औं, १३औं, १४औं र १५औं होलमा बर्डी प्रहार गरे भने ४ पारको १८औं होलमा इगल प्रहार गर्दै ब्याक नाइन ६-अन्डर ३० मा समापन गरे। सदभावले दिनको सुरुवात बोगीसहित गरेका थिए, तर तेस्रो, सातौं र नवौं होलमा एक-एक सट बचाउँदै फ्रन्ट नाइन २-अन्डर ३४ खेले। उनले ११औं होलमा बोगी प्रहार गरे पनि १२औं होलमा इगल प्रहार गरे। त्यस्तै १५औं र १८औं होलमा बर्डी सहित ब्याक नाइन ३-अन्डर ३३ मा समाप्त गरे।
तेन्जिङले पहिलो होलमा बोगी खेपेका थिए। दोस्रो, तेस्रो र सातौं होलमा एक-एक सट बचाए। आठौं होलमा डबल बोगी खेप्नुपरेको भएता पनि नवौं होलमा इगल प्रहार गरेपछि फ्रन्ट नाइन २-अन्डर ३४ मा समाप्त गरे। १०औं होलमा फेरि डबल बोगी खेपे पनि करिब ११औं होलमा दोस्रो इगल प्रहार गरे। त्यसपछि १२औं, १७औं र १८औं होलमा बर्डी प्रहार गर्दै ब्याक नाइन ३-अन्डर ३३ खेले। नोर्बुले बोगी रहित फ्रन्ट नाइन खेल्दै पहिलो, तेस्रो र सातौं होलमा बर्डी प्रहार गरी ३-अन्डर ३३ स्कोर गरे। त्यसपछि १०औं होलमा बोगी खाने क्रममा ११औं, १५औं र १६औं होलमा बर्डी प्रहार गर्दै ब्याक नाइन २-अन्डर ३४ मा समाप्त गरे।
यस सिजनको सर्वाधिक १८ लाख नगद पुरस्कार राशी रहेको प्रतियोगितामा ४६ प्रोफेसनल र २२ एमेच्योर गरी कुल ६८ खेलाडीले सहभागिता जनाएका छन्। दोस्रो दिनको समाप्तिमा कट लागू हुनेछ। शीर्ष १८ प्रोफेसनल र सोही कटमा पर्ने एमेच्योर खेलाडीहरूले अन्तिम दुई राउन्डका लागि स्थान सुरक्षित गर्नेछन्। विजेताले उपाधिसँगै नगद ३ लाख २० हजार रुपैयाँ प्राप्त गर्नेछन्। दोस्रो, तेस्रो र चौथो स्थानमा रहने खेलाडीहरूले क्रमशः २ लाख ६ हजार, १ लाख ६२ हजार र १ लाख ४५ हजार नगद पुरस्कार पाउनेछन्। शनिबार प्रो-एम प्रतियोगिता आयोजना गरिनेछ।
