३ असार, काठमाडौं । आईसीसी क्रिकेट विश्वकप लिग २ अन्तर्गत क्यानडाको किङ सिटीमा भएको क्यानडा र नेदरल्यान्ड्सबीचको एकदिवसीय खेल पिचको सुरक्षासम्बन्धी जोखिमका कारण ४.१ ओभरमै रद्द गरिएको छ। टस जितेर ब्याटिङ रोजेको नेदरल्यान्ड्सले एक विकेट गुमाएको अवस्थामा १५ रन बनाइरहेको थियो। दोस्रो ओभरमा म्याक्स ओ’डाउड शून्य रनमा आउट भएका थिए। त्यसपछि पिचबाट आएको असमान बाउन्सले खेलाडीहरूको सुरक्षामा प्रश्न उठाएपछि ब्याटरहरू एकपछि अर्को पटक बलसँग चोट खाएका थिए। लगातार खतरनाक बाउन्स देखिएपछि अम्पायर र खेल अधिकारीहरूले खेल रद्द गर्ने निर्णय लिएका हुन्।
चार दिनअघि यही मैदानमा अमेरिका र नेदरल्यान्ड्सबीच भएको खेलपछि अन्तर्राष्ट्रिय क्रिकेट परिषद् (आईसीसी) ले पिचलाई ‘असन्तोषजनक’ ठहर गरेको थियो। त्यो खेलका म्याच रेफ्री फिल थम्पसनले पिचलाई ‘अत्यन्त खराब’ भन्दै असमान बाउन्सका कारण खेलाडीहरूको सुरक्षामा जोखिम रहेको बताएका थिए। दुवै टोलीका कप्तानहरूले पनि पिचप्रति असन्तुष्टि व्यक्त गरेका थिए। त्यसपछि आईसीसीको पिच तथा आउटफिल्ड निगरानी प्रणालीअन्तर्गत किङ सिटी मैदानलाई एक डिमेरिट अंक दिइएको थियो। आईसीसीको नियमअनुसार ‘असन्तोषजनक’ पिचले एक डिमेरिट अंक पाउँछ भने ‘खेल्न अयोग्य’ पिचलाई तीन डिमेरिट अंक दिइन्छ। यी अंक पाँच वर्षसम्म कायम रहन्छन्। यदि कुनै मैदानले पाँच वर्षभित्र कुल छ डिमेरिट अंक जम्मा गरेमा १२ महिनाका लागि अन्तर्राष्ट्रिय खेल आयोजना गर्न प्रतिबन्ध लाग्छ। १२ अंक पुगेमा दुई वर्षसम्म प्रतिबन्ध लाग्ने व्यवस्था छ।
लगातार दुई खेलमा पिचको गुणस्तर र खेलाडीको सुरक्षामाथि गम्भीर प्रश्न उठेपछि किङ सिटी मैदान थप निगरानीमा पर्ने सम्भावना बढेको छ। खेल रद्द भएपछि दुवै टोलीले १-१ अंक बाँडेका छन्। लिग २ अंकतालिकामा तेस्रो स्थानको नेदरल्यान्ड्सको २८ खेलमा ३२ अंक छ भने छैटौं स्थानको क्यानडाको २४ अंक छ। नेपाल पनि २८ खेलमा २४ अंक जोडेर नेट रन रेटका आधारमा पाँचौं स्थानमा छ।
