३ असोज, काठमाडौं । बुढानिलकण्ठ नगरपालिकाले १०औँ राष्ट्रिय महिला खुल्ला बास्केटबल च्याम्पियनसिपको समूह चरणका तीनै खेल जित्दै अपराजित रहँदै सेमिफाइनलमा प्रवेश गरेको छ। नेपाल बास्केटबल संघ (नेबा) को आयोजमा कीर्तिपुर कभर्डहलमा सोमबारदेखि सुरु भएको प्रतियोगिताको समूह बी मा रहेको बुढानिलकण्ठले मंगलबार ट्रेनिङ ग्राउण्डलाई ५७-५० ले पराजित गर्दै लगातार तेस्रो जित हात पार्यो। निकै प्रतिस्पर्धात्मक खेलमा बुढानिलकण्ठले १४-१४, १२-८, १७-२३, १४-५ को प्रर्दशन गर्यो। खेलमा बुढानिलकण्ठकी अनुजा मल्लले सर्वाधिक २७ अंक जोडिन् र उनी प्लेअर अफ दि म्याच घोषित भइन्। समूह बी मा बुढानिलकण्ठ ६ अंक जोड्दै शीर्ष स्थानमा छ।
यसै समूहको अर्को खेलमा ट्रेनिङ ग्राउण्डले लुम्बिनी प्रदेशलाई ७७-६ को फराकिलो अन्तरले हराउँदै समूह उपविजेताका रूपमा सेमिफाइनलमा स्थान बनाएको छ। एकपक्षीय खेलमा ट्रेनिङ ग्राउण्डले ३३-०, १४-४, १७-०, १३-२ को स्कोर गर्दै विजयी भूमिका निभायो। ट्रेनिङ ग्राउण्डकी विनामनी योन्जनले सर्वाधिक १५ अंक हासिल गरिन् भने हिरा बोहरालाई प्लेअर अफ दि म्याच घोषणा गरियो। तीन खेलमा दुई जीत र एक हारसँगै ५ अंक जोड्दै ट्रेनिङ ग्राउण्ड सेमिफाइनलमा उपविजेताको रूपमा प्रवेश गरेको हो।
समूह ए अन्तर्गत मंगलबार सुनसरी बास्केटबल एसोसिएसन र अन्नपूर्ण बास्केटबल एसोसिएसनले पनि जित हात पारे। सुनसरीले रोमाञ्चक खेलमा आइएस नेपाललाई ३८-३६ ले पराजित गर्यो। सुरुवाती दुई क्वाटरमा आइएसले ४-३ र १०-७ को अग्रता लिए पनि सुनसरीले तेस्रो क्वाटर १३-१३ बराबरी कायम राखेको थियो र चौथो क्वाटर १५-९ ले प्राप्त गर्दै रोमाञ्चक जित हासिल गर्यो। सुनसरीकी हिमखेन लिम्बुले ८ अंक स्कोर गरिन् भने सनिता लिम्बुलाई प्लेअर अफ दि म्याच घोषित गरियो।
अर्को खेलमा अन्नपूर्णले लेट्स गो बास्केटबल एकेडेमीलाई ४८-४१ ले हरायो। अन्नपूर्णले खेलमा १५-९, ५-७, ९-९, १९-१६ को प्रतिशत प्रदर्शन गर्यो। अन्नपूर्णकी निर्भय शर्माले सर्वाधिक २५ अंक जोडिन् र उनी प्लेअर अफ दि म्याच घोषित भइन्। समूह ए बाट आइएस समूह विजेता र सुनसरी समूह उपविजेता बनेर सेमिफाइनल प्रवेश गरिसके। अब सेमिफाइनलमा समूह ए को विजेता आइएसले समूह बी को उपविजेता ग्राण्डी स्टार्ससँग खेल्नेछ भने समूह बी को विजेता बुढानिलकण्ठले समूह ए को उपविजेता सुनसरीसँग प्रतिस्पर्धा गर्नेछ। दुवै सेमिफाइनल खेल बिहीबार हुनेछ।
नेपाल बास्केटबल संघले एक दशकपछि महिला बास्केटबलको राष्ट्रिय प्रतियोगिता आयोजना गरेको हो। यस प्रतियोगिता साबा महिला बास्केटबल च्याम्पियनसिपका लागि राष्ट्रिय टिम छनोटको आधार पनि रहेको बताइएको छ। प्रतियोगितामा सहभागी ८ टोली दुई समूहमा विभाजन गरि खेलाइएको हो। समूह चरणपछि दुवै समूहका शीर्ष दुई टोली सेमिफाइनलमा पुगेका छन्। असार ६ गतेसम्म सञ्चालन हुने प्रतियोगिताको विजेताले ५० हजार र उपविजेताले ३० हजार नगद पुरस्कार प्राप्त गर्नेछन्। साथै उत्कृष्ट खेलाडी (एमभीपी) लाई १० हजार, उदीयमान टोलीलाई १० हजार र उपत्यकाबाहिरबाट सहभागी उदीयमान खेलाडीलाई ५ हजार रुपैयाँ पुरस्कार प्रदान गरिने भनिएको छ।
