पोर्चुगलका कप्तान क्रिस्टियानो रोनाल्डोले लगातार छैटौं विश्वकप खेल्ने लियोनल मेसीको कीर्तिमानसँग बराबरी गरे तापनि उनले गोल गर्न सकेका छैनन्। ३ असार, काठमाडौं। फिफा विश्वकप २०२६ अन्तर्गत आफ्नो पहिलो खेलमा पोर्चुगल डेमोक्रेटिक रिपब्लिक अफ कंगोसँग १-१ को बराबरीमा रोकिएको छ। अमेरिकाको ह्युस्टन स्टेडियममा समूह के को खेलमा पोर्चुगलले सुरुवातमै अग्रता कायम गरे तापनि त्यसलाई रक्षा गर्न नसक्दा कंगोसँग अंक बाँड्न बाध्य भयो। पोर्चुगलका जोआओ नेभेसले छैटौं मिनेटमै पेड्रो नेटोको क्रस हेड मार्फत गोल गर्दै अग्रता दिलाएका थिए।
तर विश्वकपमा ५२ वर्षपछि पुनरागमन गरेको डेमोक्रेटिक रिपब्लिक अफ कंगोले पहिलो हाफमै बराबरी गोल फर्कायो। कंगोका योहान विसाले पहिलो हाफको इन्जुरी टाइमको चौथो मिनेटमा बराबरी गोल गरेका थिए। यो फिफा विश्वकप इतिहासमा कंगोको पहिलो गोल र पहिलो अंक पनि हो। सन् १९७४ मा जायरको नाममा विश्वकप खेल्दा समूह चरणका तीन खेलमा पराजित भएको कंगोले कुनै गोल गर्न सकेको थिएन। पोर्चुगलका कप्तान क्रिस्टियानो रोनाल्डोले लगातार छैटौं विश्वकप खेल्ने लियोनल मेसीको कीर्तिमान बराबरी गरे तापनि गोल गर्न भने असफल रहे।
