सामाजिक सञ्जाल एक्सले आफ्नो विज्ञापन साझेदारहरूका लागि विज्ञापन क्याम्पेनहरूको प्रभावकारिता र नतिजा निगरानी गर्ने प्रक्रियालाई अझ सरल र अधिक व्यवस्थित बनाएको छ। कम्पनीले गुगल ट्याग म्यानेजर (जीटीएम)सँग नयाँ साझेदारी गर्दै विज्ञापन इभेन्ट ट्र्याकिङ क्षमता विस्तार गरेको छ। गुगलको ट्याग म्यानेजरले मार्केटर वा विज्ञापनदातालाई वेबसाइटको प्रमुख कोड परिवर्तन नगरी मार्केटिङ र एनालिटिक्स ट्यागहरूलाई सजिलै व्यवस्थापन गर्ने सुविधा दिन्छ। वेबसाइटमा जीटीएम कोड राखेपछि, विज्ञापनदाताहरू एउटै केन्द्रीय प्रणालीबाट सबै ट्र्याकिङ ट्यागहरू सञ्चालन गर्न सक्नेछन्। अब सरल प्रक्रिया मार्फत विज्ञापनदाताले एक्सको ट्र्याकिङ ट्याग पनि आफ्नो वेबसाइटमा थप्न पाउनेछन्।
एक्सका अनुसार, विज्ञापनदाताहरूले अब एक्स एड्स म्यानेजर भित्र बिना कुनै कोडिङ (नो-कोड एक्स्पिरियन्स) गाइडअनुसार सिधै पिक्सेल र कन्भर्सेसन एपीआई सेटअप गर्न सक्नेछन्। यसले प्राविधिक ज्ञान वा डेभलपर सहयोग बिना पनि वेबसाइटमा भएका कन्भर्सन विवरणहरूलाई ट्र्याक गर्न सम्भव बनाउँछ। यस प्रविधिलाई अझ सशक्त बनाउनका लागि एक्सले रियल-टाइम कन्भर्सेसन डायग्नोस्टिक्स नामक नयाँ लाइभ ड्यासबोर्ड पनि सुरु गरेको छ। यस ड्यासबोर्डबाट विज्ञापनदाताहरूले पिक्सेल र सीएपीआई इभेन्टहरूको स्थितिलाई प्रत्यक्ष निगरानी गर्न र प्राविधिक समस्याहरू चाँडै पत्ता लगाएर समाधान गर्न सक्षम हुनेछन्। थप रूपमा, प्राविधिक टोली र विकासकर्ताहरूको सहजताको लागि एक्सले आफ्ना सबै कन्भर्सेसन एपीआई स्रोतहरूलाई इभेन्ट्स म्यानेजर भित्र एकीकृत गरेको छ।
सम्बन्धित खबर
