३ असार, काठमाडौं । फिफा विश्वकप २०२६ अन्तर्गत जारी खेलमा इंग्ल्यान्डले क्रोएसियाविरुद्ध दोस्रो हाफमा पुनः अग्रता लिएको छ । डालास स्टेडियममा भइरहेको खेलमा जुड बेलिङहमले ४७औं मिनेटमा गोल गर्दै इंग्ल्यान्डलाई ३-२ को अग्रता दिलाएका छन् । उनले एलिएट एन्डरसनको पासमा गोल गरेका हुन् । इंग्ल्यान्डले यस खेलमा तेस्रो पटक अग्रता लिएको हो ।
यसअघि इंग्ल्यान्डका कप्तान ह्यारी केनले दुई पटक गोल गर्दै अगाडि बढाएपनि पहिलो हाफमै क्रोएसियाले पुनः बराबरी गोल फर्काएको थियो । कप्तान ह्यारी केनले १२औं मिनेटमा पेनाल्टीमा गोल गर्दै इंग्ल्यान्डलाई अग्रता दिलाएका थिए । केनले सुरुमा प्रहार गरेको पेनाल्टी क्रोएसियाका गोलकिपर डोमिनिक लिभाकोभिचले बचाएका थिए। तर केनले बल प्रहार गर्नुअघि लिभाकोभिक अगाडि बढेको देखिएपछि पुनः पेनाल्टी दिइएको थियो। यस पटक केनले कुनै गल्ती नगरी गोल गरे।
क्रोएसियाका कप्तान लुका मोडरिकले नोनी मोदुएकेलाई फल गरेपछि इंग्ल्यान्डले पेनाल्टी पाएको थियो। क्रोएसियाका मार्टिन बाटुरिनाले ३६औं मिनेटमा बराबरी गोल फर्काए। पिटर सुसिकको ले-अफ पासमा बाटुरिनाले पेनाल्टी बक्सबाहिरबाट उत्कृष्ट गोल गरे। केनले ४२औं मिनेटमा डेक्लान राइसको कर्नरबाट गोल गर्दै इंग्ल्यान्डलाई २-१ को अग्रता दिलाएका थिए। पिटर मुसाले पहिलो हाफको इन्जुरी टाइमको पाँचौ मिनेटमा क्रोएसियाका लागि बराबरी गोल फर्काए।
सम्बन्धित खबर
