फिफा विश्वकपमा ह्यारी केनले यो आफ्नो दशौँ गोल गरेका छन्। उनले विश्वकपमा सर्वाधिक १० गोल गर्ने इंग्लिस खेलाडी ग्यारी लिनेकरसँग बराबरी गरेका छन्। ३ असार, काठमाडौं। ह्यारी केनले व्यक्तिगत दोस्रो गोल गरेपछि इंग्ल्यान्डले फिफा विश्वकप २०२६ अन्तर्गत क्रोएशिया विरुद्धको खेलमा पुनः अग्रता लिएको छ। डालास स्टेडियममा जारी खेलमा केनले ४२औं मिनेटमा गोल गर्दै इंग्ल्यान्डलाई २-१ को अग्रता दिलाएका हुन्। डेक्लास लाइसको कर्नरमा केनले हेडमार्फत गोल गरेका थिए।
फिफा विश्वकपमा यो केनको दशौँ गोल हो। उनले इंग्ल्यान्डका ग्यारी लिनेकरले राखेको विश्वकपमा सर्वाधिक १० गोल गर्ने कीर्तिमानसँग बराबरी गरेका छन्। त्यस अघि कप्तान ह्यारी केनले १२औं मिनेटमा पेनाल्टीबाट गोल गर्दै इंग्ल्यान्डलाई अग्रता दिलाएका थिए। केनले सुरुमा प्रहार गरेको पेनाल्टी क्रोएशियाका गोलकिपर डोमिनिक लिभाकोभिचले रोकेका थिए। तर, केनले प्रहार गर्नु अघि नै लिभाकोभिचले अगाडि बढेको देखिएपछि पेनाल्टी दोहोर्याइएको थियो। यस पटक केनले गल्ती नगरी गोल गर्न सफल भए। क्रोएशियाका कप्तान लुका मोडरिकले नोनी मोदुएकेलाई फल गरेपछि इंग्ल्यान्डले पेनाल्टी पाएको थियो। क्रोएशियाका मार्टिन बाटुरिनाले ३६औं मिनेटमा बराबरी गोल फर्काए। पिटर सुसिकको ले-अफ पासमा बाटुरिनाले पेनाल्टी बक्स बाहिरबाट उत्कृष्ट गोल गरेका थिए।
