पहिलो खेलमा बराबरी खेलेका दुवै टोली पहिलो जितको खोजीमा हुनेछन्। फिफा विश्वकप २०२६ को समूह ‘बी’ अन्तर्गत स्विट्जरल्यान्ड र बोस्निया तथा हर्जगोभिनाबीच अमेरिकाको सोफाइ स्टेडियममा खेल हुँदैछ। पराजित हुने टोलीलाई अर्को चरणमा पुग्न कठिन हुनेछ। विश्वकप इतिहासमा पहिलोपटक आमनेसामने हुन लागेका यी दुई टोलीबीच १० वर्षअघि भएको मैत्रीपूर्ण खेलमा बोस्निया २–० ले विजयी भएको थियो। ४ असार, काठमाडौं।
फिफा विश्वकप–२०२६ अन्तर्गत समूह ‘बी’ को खेलमा स्विट्जरल्यान्ड र बोस्निया तथा हर्जगोभिना खेल्दैछन्। उक्त खेल राति पौने एक बजे अमेरिकाको लस एन्जलसस्थित सोफाइ स्टेडियममा सुरु हुनेछ। स्विट्जरल्यान्ड नियन्त्रण र बलियो तथ्याङ्कका साथ मैदान उत्रनेछ भने बोस्निया अनुशासन र कडा रक्षापंक्तिका साथ आउनेछ। यो खेल मुख्यतः स्विट्जरल्यान्डको बल पजेशन र बोस्नियाको प्रतिरोधबीचको एउटा सफा प्रतिस्पर्धा हुनेछ। साना गल्ती वा क्षणहरूले नतिजा निर्धारण गर्नेछन्।
स्विट्जरल्यान्डका कप्तान ग्रानिट जाका र स्ट्राइकर ब्रिल एम्बोलो विपक्षीलाई खतरा पार्न सक्ने खेलाडी हुन्। जाका टोलीका मुख्य संवाहक हुन्। अघिल्लो खेलमा ७० वटा पास पूरा गर्दै उनले स्विस टोलीको मध्यभाग नियन्त्रणमा राखेका थिए। यतिबेला आफ्नो खेल जीवनकै उत्कृष्ट लयमा रहेका ब्रिलले कतारविरुद्ध पेनाल्टीमार्फत गोल गरेका थिए। बोस्नियाका डिफेन्डर निकोला काटिच र स्ट्राइकर एडिन जेको स्विट्जरल्यान्डका लागि घातक बन्न सक्ने खेलाडी हुन्। ४० वर्ष पुगे पनि एडिन टोलीका सबैभन्दा अनुभवी र सर्वकालीन उच्च गोलकर्ता हुन्।
विश्वकपको पहिलो खेलले स्विट्जरल्यान्डको बल पासिङ पहिचानलाई प्रष्ट पारेको छ। उनीहरूले ६८ प्रतिशत बल पोजिशन राखे। ५७६ मध्ये ५२७ पासहरू पूरा गर्दै एक्युरेसी देखाए र २६ पटक गोलको प्रयास गरे। तर, उनीहरूको कमजोरी फिनिसिङमा देखियो। सिर्जना गरिएका ६ वटा ठूला अवसरहरूमध्ये ५ वटा गुमाए। बोस्नियाविरुद्धको खेलमा स्विट्जरल्यान्डले फिनिसिङ सुधार्ने लक्ष्य राख्नेछ।
सम्बन्धित खबर
