९ असार, काठमाडौं । इरानका राष्ट्रपति मसुद पेजेस्कियान एक दिने आधिकारिक भ्रमणका लागि पाकिस्तानको राजधानी इस्लामावाद पुगेका छन्। मंगलबार इस्लामावाद पुगेका राष्ट्रपति पेजेस्कियानलाई पाकिस्तानी प्रधानमन्त्री शहबाज शरीफले विमानस्थलमा स्वागत गर्दै १६ तोपको सलामीसमेत प्रदान गरेका थिए। दुवै नेतासँग विमानस्थलमा भएको स्वागत समारोहको तस्वीर इरानी सरकारले सार्वजनिक गरेको छ। इरानी राष्ट्रपतिको सुरक्षाका लागि छ वटा पाकिस्तानी सैन्य विमानले सुरक्षा व्यवस्था गरेका थिए।
यस भ्रमणमा इरानी राष्ट्रपति पेजेस्कियानले पाकिस्तानी राष्ट्रपति आसिफ अली जरदारी, प्रधानमन्त्री शहबाज शरीफ र अन्य नेताहरु तथा अधिकारिहरूसँग भेटवार्ता गर्ने अपेक्षा गरिएको छ। इरान र अमेरिकाबीचको सम्भावित युद्ध रोक्न पाकिस्तानले समेत मध्यस्थता भूमिका निर्वाह गरिरहेको छ। यसै सन्दर्भमा सोमबार स्विट्जरल्यान्डमा अमेरिका र इरानबीच पहिलो चरणको शान्ति वार्ता सम्पन्न भएको थियो। स्वागतयोग्य र ऐतिहासिक ठहरिएको उक्त वार्तालाई सहभागी पाकिस्तानी प्रधानमन्त्री शरीफले सफल भनेका छन्। पाकिस्तानको मध्यस्थताका प्रयासहरूलाई अन्तर्राष्ट्रिय समुदायले प्रशंसा र चर्चा गरिरहेको छ।
