९ असार, काठमाडौं। क्रिस्टियानो रोनाल्डोले कीर्तिमानी गोल गरेपछि पोर्चुगलले फिफा विश्वकप २०२६ मा पहिलो जित हात पार्दै नकआउट चरणमा प्रवेश गर्ने सम्भावना बलियो बनाएको छ। समूह के अन्तर्गत अमेरिकाको ह्युस्टनमा भएको खेलमा रोनाल्डोको दुई गोल मदतमा पोर्चुगलले पहिलो पटक विश्वकप खेलिरहेको उज्बेकिस्तानलाई ५-० ले बिस्तारा जित हासिल गरेको हो। पोर्चुगलका नुनो मेन्डेज र राफेल लिआओले पनि १-१ गोल गरे भने विरोधी टिमबाट एक आत्मघाती गोल उपहार स्वरूप पाइयो। समूह के मा पहिलो जितपछि पोर्चुगल २ खेलबाट ४ अंक जोड्दै शीर्ष स्थानमा पुगेको छ र नकआउट चरणमा पुग्ने सम्भावना थप बलियो बनाएको छ।
पहिलो खेलमा पोर्चुगलले डिआर कंगोसँग १-१ को बराबरी खेलेको थियो। लगातार दोस्रो हारपछि उज्बेकिस्तान भने समूह चरणबाटै बाहिरिने अवस्थामा पुगेको छ। अर्को खेलमा डिआर कंगोले कोलम्बियालाई पराजित गरेमा उज्बेकिस्तान अन्तिम खेल खेल्नुअघि नै समूह चरणबाट बाहिरिने निश्चित हुनेछ। पोर्चुगलले अब समूहको अन्तिम खेल कोलम्बियासँग २७ जुनमा खेल्नेछ। रोनाल्डोले खेलको छैटौं मिनेटमै गोल गर्दै लगातार ६ विश्वकपमा गोल गर्ने पहिलो खेलाडीको कीर्तिमान बनाउँदै पोर्चुगललाई सुरुमै अग्रता दिलाएका थिए।
रोनाल्डोले सन् २००६ देखि २०२६ सम्म लगातार ६ विश्वकप खेल्दा सबैमा गोल गरेका छन्। रोनाल्डोको गोलपछि पोर्चुगलले सुरुवातदेखि नै उज्बेकिस्तानलाई दबावमा राख्यो। फलस्वरुप नुनो मेन्डेजले १७औं मिनेटमा फ्रिकिक मार्फत गोल गर्दै पोर्चुगलको अग्रता दोब्बर बनाए। रोनाल्डोले पहिलो हाफमा दोस्रो गोल गर्ने क्रममा ३९औं मिनेटमा गोल थपे। यो गोलले पहिलो हाफमा पोर्चुगलले ३-० को अग्रता बनायो। रोनाल्डोले पोर्चुगलका लागि विश्वकपमा सर्वाधिक गोल गर्ने कीर्तिमान पनि तोडे।
उनी ४१ वर्ष १३८ दिनको उमेरमा उज्बेकिस्तान विरुद्ध गोल गरेका छन्। यसअघि क्यामरुनका रोजर मिल्लाले ४२ वर्ष ३९ दिनको उमेरमा सन् १९९४ को विश्वकपमा रसिया विरुद्ध गोल गरेका थिए। पहिलो हाफमा तीन गोलको अग्रता बनाएको पोर्चुगलले दोस्रो हाफमा आत्मघाती गोल उपहार पाएको थियो। म्यानचेस्टर सिटीबाट खेल्ने उज्बेकिस्तानका अब्दुभोहिद नेमातोभले ६०औं मिनेटमा बल क्लियर गर्ने क्रममा आफ्नै पोष्टमा गोल गरेपछि पोर्चुगलले ४-० को अग्रता बनायो। पोर्चुगल यतिमै रोकिएन। विकल्पी खेलाडीका रूपमा मैदान प्रवेश गरेका लिआओले ८७औं मिनेटमा गोल गरे।
