१४ असार, चितवन। चितवनको इच्छाकामना गाउँपालिकाले वडा नं. ७ का २६ घरधुरी किसानहरूलाई लक्षित गर्दै शतप्रतिशत अनुदानमा पानी ट्यांकी र पाइप वितरण गरेको छ। गाउँपालिका उपाध्यक्ष माया सिलवालले ति वडाका किसानहरूलाई खानेपानी र सिंचाइका लागि उपयोगी हुने गरी पानी ट्यांकी र पाइप वितरण गरेकी छन्। पानी ट्यांकी र पाइप पाउँदा किसानहरू खुशी भएका छन् भनी उपाध्यक्ष सिलवालले जानकारी गराएकी छिन्।
थोपा सिंचाइ कार्यक्रम अन्तर्गत उक्त क्षेत्रका बासिन्दाहरूलाई खानेपानी उपलब्ध गराउन र सिंचाइ सुविधाका लागि ५०० लिटर क्षमताका ट्यांकी र ४०० मिटर पाइप वितरण गरिएको गाउँपालिकाका प्रमुख प्रशासकीय अधिकृत चन्द्रकान्त बस्नेतले बताए। उनले भने कि वडा नं. ७ को सालठाना, दारसिड र सानो भोर्लेमा यी सामग्रीहरू वितरण गरिएको छ।
मुख्य रूपमा चेपाङ समुदाय बसोबास गर्ने यस क्षेत्रमा पानीको अभाव हुने भएकाले किसानहरूलाई पानी संकलनमा सहजता मिलोस् भन्ने उद्देश्यले ट्यांकी र पाइप वितरण अभियान सञ्चालन गरिएको प्रमुख प्रशासकीय अधिकृत बस्नेतले बताए।
