इटालीमा सुनमाया बुढाले जितिन् १२० किलोमिटर अल्ट्रा ट्रेलको उपाधि, १३ वर्ष पुरानो रेकर्ड तोड्दै नयाँ इतिहास रचिन्

प्रतियोगिता आयोजकले सामाजिक सञ्जालमार्फत सुनमायालाई ‘ला स्पोर्टिभा लावारेडो अल्ट्रा ट्रेल–१२० के’ को ‘नयाँ क्विन’ घोषणा गरेको छ। साथै, उनको सन्तुलित र रणनीतिक दौडको प्रशंसा गरिएको छ। नेपाली अल्ट्रा धाविका सुनमाया बुढाले इटालीमा सम्पन्न ला स्पोर्टिभा लावारेडो अल्ट्रा ट्रेल प्रतियोगितामा उपाधि जित्दै नयाँ इतिहास रचिन्। उनले १२० किलोमिटर दूरी १३ घण्टा ३३ मिनेट १ सेकेन्डमा पूरा गर्दै १३ वर्ष पुरानो कोर्स रेकर्ड तोडेकी छन्।

१४ असार, काठमाडौं। नेपाली अल्ट्रा धाविका सुनमाया बुढाले इटलीको कोर्टिना द आम्पेज्जोमा आयोजित १२० किलोमिटर दूरीको उक्त प्रतियोगितामा १३ घण्टा ३३ मिनेट १ सेकेन्डमा निर्धारित दूरी पूरा गर्दै नयाँ रेकर्ड कायम गरिन्। यसअघि फ्रान्सकी क्यारोलिन शाभेरोले सन् २०१५ मा १३ घण्टा ४० मिनेट ३४ सेकेन्डमा लक्ष्य पूरा गर्दै रेकर्ड राखेकी थिइन्। प्रतियोगिताको सुरुआती चरणमा सुनमायाले अष्ट्रेलियाकी धाविका लुसी बार्थोलोम्यूससँगै प्रतिस्पर्धा गरिन्। तर दौडको निर्णायक चरणमा उनले गति बढाउँदै अग्रता बनाइन् र अन्तिम खण्डमा प्रतिस्पर्धीलाई पछि पार्दै पहिलो स्थान हासिल गरिन्।

आयोजकले सुनमायाले कोर्टिना द आम्पेज्जोमा इतिहास रच्दै १३ वर्ष पुरानो कोर्स रेकर्ड तोडेको उल्लेख गरेका छन्। सुनमाया बुढा जुम्ला जिल्लाको पातारासी गाउँपालिकाकी हुन्। यस सफलतासँगै अन्तर्राष्ट्रिय अल्ट्रा ट्रेल रनिङमा नेपालको प्रतिष्ठा अझ उँचो बनाएको भन्दै उनले प्रशंसा प्राप्त गरिरहेकी छन्।