यस विश्वकपमा अफ्रिकी राष्ट्रहरूले समूह चरणमा उत्कृष्ट प्रदर्शन गरेका छन्। बलिया टिमहरूलाई स्तब्ध बनाइरहेको अवस्थामा कंगो पनि त्यही लक्ष्यमा हुनेछ। फिफा विश्वकप २०२६ अन्तर्गत राउण्ड अफ ३२ को खेलमा इंग्ल्यान्ड र डिआर कंगो बुधबार राति पौने १० बजे एटलान्टा स्टेडियममा आमनेसामने हुनेछन्। विश्वकपको नकआउट चरणमा पहिलो पटक भेट हुने यी दुई टोलीबीचको खेल इंग्ल्यान्डका लागि अफ्रिकी राष्ट्रविरुद्ध अपराजित यात्रा कायम राख्ने चुनौती बनेको छ। ५ दशकपछि विश्वकपमा फर्किएको कंगो इतिहासमै पहिलो पटक नकआउट चरणमा पुगेको हो भने इंग्ल्यान्ड समूह विजेताका रूपमा अगाडि बढेको छ।
फिफा विश्वकप २०२६ को नकआउट चरणको खेल सुरु भएसँगै अनपेक्षित परिणामहरू आउने र खेलको रोमाञ्च बढ्ने क्रम जारी छ। पाराग्वेले जर्मनीलाई नकआउट गरेको र मोरक्कोले नेदरल्यान्ड्सलाई हराएको नतिजाले विश्वकपको चर्चा बढाएको छ। इंग्ल्यान्डले राउण्ड अफ ३२ मा अफ्रिकी राष्ट्र डिआर कंगोसँग बुधबार खेल्नेछ र यस खेलमा कंगोसँग सजग रहनेछ। विशेष गरी नकआउट चरणको खेल पेनाल्टी सुटआउटसम्म पुग्ने सम्भावना धेरै भएकाले रोमाञ्चकता अझै बढ्दो छ। इंग्ल्यान्ड र डिआर कंगोबीचको खेल नेपाली समयअनुसार बुधबार राति पौने १० बजे एटलान्टा स्टेडियममा सुरु हुनेछ।
फिफा वरियतामा इंग्ल्यान्ड चौथो वरियतामा छ भने डिआर कंगो ४६औं स्थानमा छ। इंग्ल्यान्ड अफ्रिकी टिमहरूसँग ९ खेलमा अपराजित छ, जसमा ५ खेल जितेको र ४ खेल बराबरी गरेको छ। इंग्ल्यान्डले यसअघि दुई पटक अफ्रिकी राष्ट्रविरुद्ध नकआउट चरणमा विजय हासिल गरेको छ। ह्यारी केन इंग्ल्यान्डका लागि विश्वकपमा सर्वाधिक ११ गोल गरिसकेका छन् र यो संख्या बढाउने लक्ष्यमा छन्। कंगोका डिफेन्डर आरोन वान विसाका र एक्सल टुएनजेबेलाई इंग्ल्यान्डको म्यानचेस्टर युनाइटेडसहित पाँच फरक क्लबबाट खेलेका छन्।
डिआर कंगोको कथा फरक छ। ५२ वर्षपछि विश्वकपमा पुनरागमन र विश्वकपमै दोस्रो सहभागिता हो। समूह के मा कंगोले १ जित, १ बराबरी र १ हार निकाल्यो। पहिलो खेलमा उपाधि दाबेदार पोर्चुगललाई १-१ को बराबरीमा रोकेपछि कंगोको चर्चा बढेको थियो। समूह विजेता कोलम्बिया र उपविजेता पोर्चुगल भन्दा पछि तेस्रो भएपनि उत्कृष्ट ८ तेस्रो टोलीभित्र पर्दै कंगो नकआउट चरणमा पुगेको हो। इंग्ल्यान्ड र कंगोको यो पहिलो भेट हुनेछ।
इंग्ल्यान्डका लागि कप्तान ह्यारी केन मुख्य गोलकर्ताको रूपमा देखिएका छन् भने जुड बेलिङहम र डेक्लान राइस जस्ता खेलाडीहरू पनि महत्वपूर्ण भूमिका खेल्नेछन्। कंगोका लागि इंग्ल्याण्डकै लिग खेल्ने खेलाडीहरूले पनि राम्रो प्रदर्शन गरिरहेका छन्। फरवार्ड योआन विसाले कंगोका लागि ३ गोल गरिसकेका छन् र उनी टिमका हेर्न लायक खिलाड़ी हुन्।
