२० असार, काठमाडौं । फिफा विश्वकप २०२६ को राउण्ड अफ ३२ का खेलहरू सम्पन्न भई सकेपछि अन्तिम १६ अर्थात् प्रि-क्वाटरफाइनलको समीकरण स्पष्ट भइसकेको छ। अन्तिम १६ मा युरोप र अमेरिकामा आधारित टोलीहरूको प्रभुत्व रहेको छ। अफ्रिकाबाट केवल दुई टोली मात्र अन्तिम १६ मा पुग्न सफल भएका छन् भने एसियाबाट कुनै पनि टोलीले यो चरणमा प्रवेश गर्न सकेन। अफ्रिकाबाट ९ टोली राउण्ड अफ ३२ मा पुगेका थिए, जस मध्ये ७ टोली पराजय भई बाहिरिएका छन्। मोरक्को र इजिप्टमात्रै अन्तिम १६ मा पुगेका टोली हुन्।
त्यस्तै, एसियाबाट जापान र एसियन कोटामा खेल्ने अस्ट्रेलिया दुबै राउण्ड अफ ३२ मा पराजित हुँदै बाहिरिएका छन्। यस कारण विश्वकपको अन्तिम १६ मा एसियाली टोलीहरूको उपस्थिति छैन। अन्तिम १६ मा युरोपबाट सबैभन्दा धेरै ७ टोलीहरूले स्थान बनेका छन्। युरोपबाट पूर्व उपविजेता फ्रान्ससहित पूर्व विजेता स्पेन, इंग्ल्यान्ड, बेल्जियम, पोर्चुगल, नर्वे र स्विट्जरल्यान्डले स्थान बनाएका छन्।
दक्षिण अमेरिकाबाट साविक विजेता अर्जेन्टिना सहित ब्राजिल, कोलम्बिया र पेराग्वे गरी ४ टोलीले अन्तिम १६ मा स्थान बनाउन सफल भएका छन्। राउण्ड अफ ३२ मा पुगेका मध्ये दक्षिण अमेरिकाको इक्वेडर मात्र अन्तिम १६ मा स्थान बनाउन असफल भयो। उत्तरी अमेरिकाबाट अमेरिका, मेक्सिको र क्यानडा तीनै देशले राउण्ड अफ ३२ मा जीत हासिल गर्दै अन्तिम १६ मा स्थान बनाउन सफल भएका छन्। अन्तिम १६ मा को-को खेल्नेछन्? असार २० गते क्यानडा विरुद्ध मोरक्को राति २२:४५ बजे, असार २१ गते पेराग्वे विरुद्ध फ्रान्स बिहान २:४५ बजे, असार २२ गते ब्राजिल विरुद्ध नर्वे बिहान १:४५ बजे, मेक्सिको विरुद्ध इंग्ल्यान्ड बिहान ५:४५ बजे, असार २३ गते पोर्चुगल विरुद्ध स्पेन बिहान १२:४५ बजे, अमेरिका विरुद्ध बेल्जियम बिहान ५:४५ बजे, अर्जेन्टिना विरुद्ध इजिप्ट राति २१:४५ बजे र असार २४ गते स्विट्जरल्यान्ड विरुद्ध कोलम्बिया बिहान १:४५ बजे।
