फेब्रुअरीमा मारिएका सर्वोच्च नेता खामेनेईको सम्झनामा इरानमा सार्वजनिक शोक कार्यक्रम सुरु

अमेरिकी र इजरायली हमलामा मारिएका चार महिनाभन्दा बढी समयपछि इरानले आफ्ना पूर्व सर्वोच्च नेता आयतोल्लाह अली खामेनेईका लागि धेरै दिन लामो सार्वजनिक शोक तथा अन्तिम संस्कार कार्यक्रम सुरु गरेको छ। पूर्व आयतोल्लाहको शव हाल तेहरानको ग्रान्ड मोसल्ला मस्जिदमा राखिएको छ। आउँदो बिहीवार उनकाे गृहनगर मशहदमा अन्तिम संस्कार गरिनेछ। इरानी अधिकारीहरूका अनुसार ती समारोहहरूमा १ करोड २० लाखदेखि २ करोडसम्म मानिस सहभागी हुने अपेक्षा गरिएको छ। अधिकारीहरूले यसलाई शताब्दीको अन्तिम संस्कार भनेर व्याख्या गरेका छन्।

इरान र अमेरिकाबीच जुन महिनामा भएको प्रारम्भिक द्वन्द्वबिराम सम्झौतापछि सुरु भएको कमजोर युद्धविरामको बेला अन्तिम संस्कार आयोजना भएको हो। शुक्रबार ग्रान्ड मोसल्लामा इस्लामिक गणतन्त्रको रङले पोतेका खामेनेईको शवपेटिका माथि उठाइएको देखिएको छ। त्यहाँ इरानका राष्ट्रपति मसूद पेजेस्कियान, पाकिस्तानका प्रधानमन्त्री शहबाज शरीफ, पूर्व रूसी राष्ट्रपति दिमित्री मेदभेदेभ र अफगान तालिबानका विदेशमन्त्री अमिर खान मुत्ती पनि उपस्थित थिए।

छ दिनसम्म चल्ने ती समारोहको एक भागको रूपमा शनिवार तेहरानमा औपचारिक अन्तिम संस्कार गरिने छ। यसको नेतृत्व तेहरानस्थित मोहम्मद रसूलल्लाह कोरले गरिरहेका छन्। खामेनेईको शव प्रदर्शनका लागि एक उच्च मञ्चमा राखिँदैछ। शनिवार बिहानदेखि त्यहाँ १५ देखि २० मिनेटका अन्तरालमा आगन्तुकहरूलाई प्रवेश र बाहिर निस्कन अनुमति दिने गरी व्यवस्था गरिने जनाइएको छ। खामेनेई फेब्रुअरी महिनाको अन्त्यमा इरानमा इजरायली र अमेरिकी संयुक्त आक्रमणमा मारिएका थिए र त्यसयता उक्त क्षेत्र युध्दले प्रभावित भएको छ।