अफ्रिकाका १० वटा टापुहरू मिलेर बनेको केप भर्डेले विश्वकपमा पहिलो सहभागितामै उत्कृष्ट प्रदर्शन गर्दै बलिया विपक्षी टोलीहरूसँग कडा प्रतिस्पर्धा गर्यो। समूह चरणमा अपराजित रहँदै पहिलो सहभागितामै नकआउट चरणमा पुगेर इतिहास रच्यो। ४० वर्षिय गोलकिपर भोजिन्हाले उत्कृष्ट बचाउ गर्दै विश्वभर चर्चा पाए।
यसपटक विश्वकपमा गोल गर्ने खेलाडी मात्र होइन, विपक्षीको आक्रमण रोक्ने गोलकिपरहरूको पनि चर्चा उत्तिकै छ। उपाधि दावेदार ठूला टोली र स्टार खेलाडीहरूको चर्चा स्वाभाविक हो। तर उत्तर अमेरिका, मेक्सिको र क्यानडामा भइरहेको फिफा विश्वकप २०२६ मा नयाँ टोली र त्यसका खेलाडीहरू पनि ओझेलमा छैनन्। केप भर्डेले पहिलो विश्वकपमा शानदार प्रदर्शन गर्दै बलिया विपक्षीलाई कडा चुनौती दियो। साविक विजेता अर्जेन्टिनालाई झन्डै पराजित गर्ने स्थितिमा पुगेको थियो।
राउण्ड अफ ३२ मा उपाधि दावेदार अर्जेन्टिनालाई १-१ को बराबरीमा रोकी खेल अतिरिक्त समयमा पुर्याएको केप भर्डे अन्ततः आत्मघाती गोलका कारण ३-२ ले पराजित हुँदै बाहिरियो। लियोनल मेसीको अगुवाइमा अर्जेन्टिनासँग भएको केप भर्डेको साहसलाई विश्वका फुटबल पण्डितदेखि समर्थक र पूर्व खेलाडीहरूले खुलेर प्रशंसा गरेका छन्। खेल सकिन ९ मिनेट बाँकी (१११औं मिनेट) डिने बोर्गासको आत्मघाती गोलमा केप भर्डे पराजित भयो।
स्कटल्याण्डका पूर्व अन्तर्राष्ट्रिय खेलाडी जेम्स म्याकफाडेनले भने, ‘केप भर्डे हार्यो तर सबैको मन जित्यो। उनीहरूले मैदानमा साहस, एकता र विश्वासी भावना देखाए।’ इंग्ल्यान्डका पूर्व खेलाडी ग्यारी नेभिलले पनि केप भर्डेको प्रशंसा गर्दै भने, ‘मैले कुनै अन्डरडग टोलीबाट देखेको उत्कृष्ट प्रदर्शनमध्ये यो उत्कृष्ट हो। उनीहरू घर फर्कँदा रुन्दैछन् किनकि उनीहरू यहाँ मरुभूमिमा नै बाँकी जीवन बिताउन चाहन्छन्।’
केप भर्डेका प्रशिक्षक बुबिस्टाले भने, सानो भएपनि उत्कृष्ट टोलीसँग प्रतिस्पर्धा गर्ने क्षमता देखाइएको र यसमा गर्व लागेको बताए। ‘हामी सानो देश हुन सक्छौं तर विश्वका उत्कृष्ट टोलीसँग प्रतिस्पर्धा गर्ने हाम्रो क्षमता छ। यो हाम्रो लागि ठूलो गर्वको कुरा हो।’ उनले थपे, ‘हामीले इतिहास रच्यौँ र देशलाई गौरवान्वित तुल्यायौँ।’
