२१ असार, काठमाडौं । फिफा विश्वकप २०२६ को राउन्ड अफ १६ मा इंग्ल्यान्ड र मेक्सिको भोलि बिहान आमनेसामने भइरहेका छन्। घरेलु महादेशको फाइदा लिदै रंगशालामा आफ्ना हजारौँ समर्थकहरूको उत्साहित ‘मेक्सिकन वेभ’ ऊर्जा लिएर मैदान उत्रने मेक्सिकोले इंग्ल्यान्ड जस्तो बलियो टोलीलाई स्तब्ध पार्दै क्वार्टरफाइनलमा स्थान बनाउन खोज्नेछ। कागजमा इंग्ल्यान्डलाई बलियो र तारामाथि तारासहितको देखिए पनि मेक्सिको आफ्नो जोशिलो खेलशैली र कडा रक्षात्मक रणनीतिका कारण परिचित छ। यो ‘गर वा मर’ शैलीको दबाबयुक्त खेलमा दुवै टोलीका केही खेलाडीहरूको प्रदर्शन नै खेलको नतिजा परिवर्तन गर्न निर्णायक साबित हुनसक्छ।
इंग्ल्यान्डका कप्तान तथा आक्रमणका मुख्य स्तम्भ ह्यारी केन (स्ट्राइकर) टोलीका सर्वकालीन महान् स्ट्राइकर हुन्। केन बक्सभित्रको निर्दोष फिनिश र ‘फल्स नाइन’ भूमिकाबाट तल झरेर जुड बेलिङहम र बुकायो साकाका लागि अवसर सिर्जना गर्न दक्ष छन्। दबाबयुक्त नकआउट खेलमा उनको अनुभव टोलीमा अमूल्य रहनेछ।
जुड बेलिङहम (मिडफिल्ड) रियल मड्रिडका जोशिला मिडफिल्डर हुन् र इंग्ल्यान्डको खेल सञ्चालन गर्ने मुख्य इन्जिन हुन्। मिडफिल्डमा बल जित्ने, खेलको गति नियन्त्रण गर्ने र आकस्मिक रूपमा बक्सभित्र छिर्ने उनका बहुमुखी क्षमताले मेक्सिको रक्षालाई ठूलो चुनौती दिनेछ। बुकायो साका (विङ्गर) आर्सनलका तिव्र गतिका विङ्गर हुन्। उनको द्रुत गति, बक्सभित्र छिर्न सक्षम ड्रिब्लिङ शैली र उत्कृष्ट क्रसहरूले मेक्सिकोको रक्षालाई निरन्तर सक्रिय राख्ने निश्चित छ।
मेक्सिकोका राउल जिमेनेज (फरवार्ड) टोलीको आक्रमणका मुख्य चेहरा हुन्। युरोपेली क्लब फुटबलमा उत्कृष्ट प्रदर्शन गर्दै राष्ट्रिय टोलीका भरपर्दा स्ट्राइकर बनेका जिमेनेजले इंग्ल्यान्डका डिफेन्डरहरूलाई पेनाल्टी बक्सभित्र व्यस्त राख्दै स-साना अवसरलाई पनि गोलमा परिणित गर्न सक्ने दक्षता राख्छन्। जुलियन क्विनोनेस (विङ्गर) आफ्नो गति, शारीरिक शक्ति र उत्कृष्ट ड्रिब्लिङका कारण प्रख्यात छन् र मेक्सिकोका महत्वपूर्ण गोलकर्ता हुन्।
एड्सन अल्भारेज (मिडफिल्डर) वेस्ट ह्यामका डिफेन्सिभ मिडफिल्डर तथा टोलीका कप्तान हुन्। उनी मेक्सिकोको रक्षापङ्क्तिको अगाडि मुख्य ढाल जस्तै छन्। इंग्ल्यान्डका जुड बेलिङहम र फिल फोडेनको सिर्जनात्मक प्रयासहरूलाई मिडफिल्डमै रोक्ने र काउन्टर-अट्याकको सुरुवात गर्ने जिम्मेवारी उनका काँधमा पर्नेछ।
सम्बन्धित खबर
