२१ असार, काठमाडौं । कृषि विभागले किसानहरूलाई गुणस्तरीय बीउ सहज रूपमा उपलब्ध गराउने उद्देश्यले १८ जिल्लाका ५८ स्थानिय तहहरूमा ‘स्रोत बीउ उत्पादन कार्यक्रम’ सुरु गरेको छ। संघीय सरकारको सशर्त वित्तीय हस्तान्तरण कार्यक्रम अन्तर्गत उन्नत बीउ उत्पादन गर्न विभागले यो पहल गरेको हो। यस कार्यक्रमअन्तर्गत ‘हर्दिनाथ–१’ र ‘हर्दिनाथ–३’ वर्णशंकर (हाइब्रिड) जातका धानलाई प्रवर्द्धन गर्न लागिएको छ। साथै, २१ वटा जोन र ५ वटा सुपरजोनमार्फत वर्षे तथा चैते धान खेतीमा यान्त्रिकीकरण र मूल्य श्रृंखला विकास गरिनेछ। चैते धान खेती प्रवर्द्धन गर्न किसानहरूलाई विशेष अनुदान समेत उपलब्ध गराउने विभागको योजना छ।
कृषि विभागका महानिर्देशक प्रकाशकुमार सञ्जेलले जलवायु परिवर्तनका प्रभाव कम गर्न नयाँ र उत्थानशील धान जात विकासमा ध्यान दिइएको बताए। ‘जलवायु परिवर्तनका नकारात्मक प्रभाव घटाउन हामी धान बालीमा उत्थानशील जात विकास गर्दैछौँ,’ महानिर्देशक सञ्जेलले भने, ‘छरुवा प्रविधि, पालैपालो जमिन भिजाउने र सुकाउने, वर्षाको पानी संकलन गर्ने प्रविधिको विस्तारमा पनि हामी जोड दिइरहेका छौँ।’ त्यसैगरी विभागले यस वर्षदेखि थप ४ जिल्लामा धानमूख्य नयाँ परियोजना अघि बढाएको छ। महोत्तरी, सर्लाही, नुवाकोट र नवलपरासी (बर्दघाट सुस्ता पश्चिम) का ८ स्थानिय तहहरूमा यो परियोजना सुरु गरिएको विभागले जनाएको छ।
