२१ असार, काठमाडौं। स्थानीय प्रशासनले कान्ति लोकपथमा रातिको समयमा सवारी सञ्चालनमा रोक लगाएको छ। आज राति देखि लागू हुनेगरी अर्को सूचना नभएसम्म मकवानपुर–सिन्धुली जाने सार्वजनिक तथा निजी यात्रुबाहक सवारी साधनलाई साँझ ७ बजेदेखि बिहान ५ बजेसम्म कान्ति लोकपथमा आवागमनमा रोक लगाउने निर्णय जिल्ला प्रशासन कार्यालय ललितपुरले जानकारी दिएको छ।
मनसुन सक्रिय भएसँगै कुनै पनि बेला विपद् आउन सक्ने सम्भावनालाई ध्यानमा राखेर प्रशासनले यस्तो बन्देज लगाएको हो। कान्ति लोकमार्गको अधिकांश सडक जोखिमयुक्त भौगोलिक तथा भूगर्भीय अवस्थाका कारण संवेदनशील छ। त्यसै कारण वर्षायाममा पहिरो जाने, ढुंगा खस्ने तथा सडक अवरुद्ध हुने सम्भावना प्रशासनले उल्लेख गरेको छ।
