२१ असार, काठमाडौं । अस्ट्रेलियाले आईसिसी महिला टी-२० विश्वकपको उपाधि जितेको छ। आइतबार राति सम्पन्न फाइनल खेलमा इंग्ल्यान्डलाई ६ विकेटले पराजित गर्दै अस्ट्रेलियाले यो प्रतियोगिता सातौँ पटक आफ्नो नाममा पारेको हो। इंग्ल्यान्डले तोकेको १५१ रनको लक्ष्य अस्ट्रेलियाले १७ बल बाँकी रहँदा ४ विकेट गुमाएर पुरा गर्यो। बेथ मूनीले ६४ तथा फोबे लिचफिल्डले ४८ रन बनाए। इंग्ल्यान्डका लागि चार्लोट डिन, लाउरेन बेल र सोफी एक्लेस्टोनले प्रत्येकले १-१ विकेट लिए।
त्यसअघि टस हारेर पहिला ब्याटिङ गरेको इंग्ल्यान्डले २० ओभरमा ४ विकेट गुमाएर १५० रन बनाएको थियो। कप्तान नाट सिभर ब्रन्टले अविजित ५८ रन बनाइन् भने फ्रेया केम्पले ४४ रन बनाउँदै अविजित रहिन्। अस्ट्रेलियाका लागि किम गर्थ, लुसी हामिल्टन, कप्तान सोफी मोलिनक्स र एनाबेल सदरल्यान्डले १-१ विकेट लिए। अस्ट्रेलिया प्रतियोगिताभर अपराजित रहँदै च्याम्पियन बन्यो। समूह चरणका सबै ५ खेल जितेको अस्ट्रेलियाले सेमिफाइनलमा वेस्ट इन्डिजलाई पनि पराजित गरेको थियो।
