२१ असार, पोखरा। नेपाल हाप्किडो संघको आयोजनामा पोखरामा सम्पन्न ११औं राष्ट्रिय हाप्किडो प्रतियोगिता–२०८३ मा दाङ टिमले च्याम्पियनको उपाधि हात पार्यो। असार २० र २१ गते आयोजित प्रतियोगितामा देशभरका ५२ जिल्लाका खेलाडीबीच प्रतिस्पर्धा भएको थियो। दाङले ८ स्वर्ण, ४ रजत र ३ कांस्य पदक जित्दै टिम च्याम्पियनको उपाधि सुनिश्चित गर्यो। रूपन्देहीले ५ स्वर्ण र २ कांस्य पदकसहित दोस्रो स्थान हासिल गर्यो भने कास्की ३ स्वर्ण, ३ रजत र ३ कांस्य पदकसहित तेस्रो स्थानमा रह्यो।
व्यक्तिगततर्फ महिलामैत्री कास्कीकी मेग्मा गुरुङ र पुरुषतर्फ दाङका उमङ्ग घर्ती मगर उत्कृष्ट खेलाडी घोषणा गरिए। उत्कृष्ट रेफ्रीमा महिलातर्फ बन्दना बस्नेत र पुरुषतर्फ विशाल थापाले सम्मान पाए। प्रतियोगिताको अध्यक्षता नेपाल हाप्किडो संघका अध्यक्ष काली बहादुर घर्ती मगरले गरेका थिए। उद्घाटन समारोह गण्डकी प्रदेश सरकारका कृषि, भूमि व्यवस्था तथा सहकारी मन्त्री भीमबहादुर कार्कीले गरेका थिए भने समापन समारोहमा गण्डकी प्रदेश सरकारका भौतिक पूर्वाधार विकास तथा यातायात व्यवस्था मन्त्री गोविन्दबहादुर नेपाली प्रमुख अतिथि थिए।
समारोहमा प्रमुख अतिथि नेपालीले विजेता खेलाडी तथा टोलीलाई पदक, ट्रफी र प्रमाणपत्र वितरण गर्दै खेललाई राष्ट्र निर्माणको महत्वपूर्ण आधार भएको बताए। आत्मरक्षा र अनुशासनमा आधारित हाप्किडो खेलको विकासका लागि प्रदेश सरकारले सकारात्मक भूमिका लिने उनको भनाइ थियो। कार्यक्रममा गण्डकी प्रदेश खेलकुद परिषद्का बोर्ड सदस्य खिम पुन मगर, नेपाल हाप्किडो संघकी केन्द्रीय कोषाध्यक्ष विजया कुमारी वाइबा र केन्द्रीय सदस्यहरू राजेन्द्र मडै, धनराज गुरुङ तथा युवराज गुरुङ लगायतको उपस्थिति रह्यो। अध्यक्ष घर्ती मगरले प्रतियोगिता सफल बनाउन सहयोग गर्ने खेलाडी, प्रशिक्षक, रेफ्री, निर्णायक, स्वयंसेवक, जिल्ला हाप्किडो संघ, सुरक्षा निकाय, सञ्चारकर्मी, प्रायोजक तथा सहयोगी संस्थालाई विशेष धन्यवाद दिए। उनले हाप्किडोको विस्तार, गुणस्तरीय खेलाडी उत्पादन र अन्तर्राष्ट्रिय प्रतिस्पर्धाका लागि सक्षम खेलाडी तयार गर्ने लक्ष्यमा संघ निरन्तर सक्रिय रहने बताए। नेपाल हाप्किडो संघका अनुसार दुईदिने प्रतियोगिताले राष्ट्रियस्तरका प्रतिभाशाली खेलाडीको पहिचान, प्राविधिक दक्षता अभिवृद्धि र नेपाली हाप्किडोको प्रचारप्रसारमा महत्वपूर्ण योगदान पुर्याएको छ।
