बारम्बार नीतिगत र कानुनी रूपमा खेलकुदलाई शिक्षासँग जोड्ने प्रतिबद्धता जनाइरहेका खेलकुद मन्त्री सस्मित पोखरेलले पहिलो सय दिनभित्र शिक्षा र खेलकुदलाई जोड्ने दिशामा ठोस कदम चाल्न सकेका छैनन्। २१ असार, काठमाडौं। शिक्षा तथा खेलकुद मन्त्री पोखरेलले केही दिनअघि आफ्नो पहिलो सय दिनभित्र मन्त्रालयबाट भएका कामहरूको विवरण सार्वजनिक गरेका छन्। आफ्नो जारी गरेको विवरणमा मन्त्री पोखरेलले काभा महिला राष्ट्रिय लिगलाई पनि मन्त्रालयको उपलब्धिको रूपमा समावेश गर्न सफल भएका छन्। उक्त प्रतियोगिता नेपाल भलिवल संघले आयोजना गरेको थियो र मन्त्री अतिथिको रूपमा कार्यक्रममा सहभागी भएका थिए।
खेलकुदलाई प्राथमिकता नदिने आरोप खेपिरहेका मन्त्री पोखरेलले सार्वजनिक गरेका ४२ कार्यविवरणमध्ये आठवटा बुँदामा खेलकुद क्षेत्र समेटिएको छ। काभा महिला राष्ट्रिय लिगदेखि प्रत्येक वर्ष हुने राष्ट्रपति रनिङशिल्ड प्रतियोगितालाई मन्त्रीले उपलब्धिको रूपमा उल्लेख गरेका छन्। साथै, ६० जनालाई प्रशिक्षक प्रशिक्षण तालिम दिएको, सम्झौताअनुसार २७ जना खेलाडी, परिवार र कर्मचारीको उपचार सिफारिस गरेको जानकारी पनि मन्त्रीको पहिलो सय दिनको उपलब्धिमा समावेश छ। गत माघ मसान्तदेखि रोकिएको मिसन २०२६ को विशेष प्रशिक्षण जेठ १ गतेबाट पुनः सुरु गरिएको छ। पोखरेल मन्त्री बन्ने करिब दुई महिनापछि मात्र प्रशिक्षण पुनः सुरु भएको हो, जुन उनले सार्वजनिक गरेको विवरणमा उल्लेख छ।
खेलाडीहरूको क्षमता अभिवृद्धिका लागि १३ जनालाई खेल विज्ञान तालिम दिइएको, खेल संघबाट भएका राष्ट्रिय प्रतियोगिता र विदेशमा नेपाली खेलाडीहरूको सहभागितालाई पनि मन्त्रालयले आफ्नो उपलब्धिको रूपमा राखेको छ। पटकपटक खेलकुदलाई शिक्षासँग जोड्ने नीति र कानुनी प्रतिबद्धता व्यक्त गरे पनि मन्त्री पोखरेलले पहिलो सय दिनभित्र शिक्षा र खेलकुदलाई जोड्ने दिशामा ठोस कदम चाल्न सकेनन् र उक्त उपलब्धिमा पनि यस पक्ष देखिँदैन। राष्ट्रिय खेलकुद परिषद् (राखेप) का पूर्व कार्यकारी सदस्य कमल भट्टराईले मन्त्रालयको सय दिनको काममा एसियाली खेलकुदका टोलीहरू पठाउने निर्णय बाहेक ठोस काम देखिएको छैन भन्ने बताएका छन्।
‘मन्त्रीको उपलब्धि सूचीमा रहेका राष्ट्रपति कप र काभा भलिबलजस्ता कार्यक्रमहरू पुराना वार्षिक कार्ययोजनामा रहेका नियमित कार्यक्रमहरू हुन्। नयाँ सरकारले यसमा कुनै नयाँपन ल्याउन सकेको छैन,’ भट्टराईले भने, ‘खेलकुदलाई अगाडि बढाउन नविनता देखिँदैन।’ राखेपका पूर्व सदस्य सचिव युवराज लामाले पनि भट्टराईजस्तै कुरा स्वीकारेका छन्। पूर्वाधार निर्माण बाहेक खेलकुदमा अन्य कुनै उल्लेखनीय काम नभएको उनी बताउँछन्। ‘खेलकुद ऐनको संशोधन र नयाँ कार्ययोजना ल्याउने कुनै ठोस काम भएको छैन,’ लामाले भने, ‘मन्त्रीको कार्यक्षेत्र शिक्षा र खेलकुद दुवै भए तापनि ध्यान धेरै खेलकुदभन्दा शिक्षामा देखिन्छ।’
