२३ असार, काठमाडौं । सरकारले नयाँ प्रतिबद्धता प्रस्तुत गरेको भए पनि ‘असारे विकास’को प्रवृत्ति परिवर्तन भएको छैन। यस वर्ष पनि सिरहामा विकासका काम पुरानै शैलीमा भइरहेको अवस्था देखिएको छ। आर्थिक वर्ष २०८२/०८३ सकिन केही दिन मात्र बाँकी रहँदा जिल्लाका विभिन्न स्थानीय तहमा रातारात सडक तथा नाला ढलान, मन्दिर तथा पोखरी सौन्दर्यीकरणका काम तीव्र रूपमा भइरहेका छन्। त्यस्ता कामका सम्बन्धमा कुनै सूचना वा जानकारी निर्माणस्थलमा राखिएको पाइँदैन। अधिकांश योजनास्थलमा अनिवार्य रूपमा राखिनुपर्ने सूचनापाटीको अभाव छ, जसका कारण स्थानीयले योजना, बजेट, निर्माणकर्ता र काम सम्पन्न गर्ने अवधि जस्ता आधारभूत जानकारी प्राप्त गर्न कठिनाइ भोगिरहेका छन्।
मधेश प्रदेश सरकारको भौतिक पूर्वाधार विकास मन्त्रालय अन्तर्गत करिब २० लाख रुपैयाँ लागतमा गोलबजार नगरपालिका–११ बल्कवास्थित रेडक्रस क्षेत्रमा निर्माणाधीन १०६ मिटर सडक आरसीसी शनिबार राति करिब १२ बजेतिर ढलान गरिएको थियो। स्थानीयका अनुसार रातको समयमा हतार–हतार गरिएको ढलानमा आवश्यक रड जालीसमेत प्रयोग गरिएको थिएन। स्थानीय शेख खानले भने, “उपभोक्ता समिति, बजेट वा योजनाबारे कुनै जानकारी छैन।” अर्का स्थानीय नसिम शेखले सडकको घुमाउरो भाग फराकिलो बनाउन सुझाव दिए पनि मध्यरातमा ढलान गर्नुको कारणबारे अनविज्ञता व्यक्त गरे।
गोलबजार नगरपालिका–४ मा पनि आर्थिक वर्ष सकिनुअघि बजेट खर्च गर्ने हतार गरिएको भन्दै स्थानीयले आलोचना गरेका छन्। मधेश प्रदेश सरकारको योजनाअन्तर्गत क्याम्पस रोडदेखि लम्बोदर दाहालको घरसम्म १२० मिटर नाला ढलान रातको समयमा गरिएको स्थानीयहरूको भनाइ छ। वडाध्यक्ष सकलदेव यादवले भने, “वडाभरि सडक मर्मत–सम्भार तथा स्तरोन्नतिका लागि १० लाख रुपैयाँ विनियोजन गरिएको छ।” तर कोटेसन कसलाई दिइएको हो भन्ने विषयमा नगरपालिकाबाट जानकारी लिन अनुरोध गरे।
सिरहा नगरपालिका–७ मा पनि आर्थिक वर्षको अन्तिम समयमा सडक आरसीसी ढलान तथा नाला निर्माणको काम तीव्र भएको छ। आयुष्मान निर्माण सेवाले १ करोड ३३ लाख १७ हजार ४२८ रुपैयाँ ६७ पैसामा ठेक्का पाएको उक्त योजना २०८३ असार मसान्तसम्म सम्पन्न गर्ने सम्झौता भए पनि अन्तिम समयमा मात्रै निर्माण थालिएको छ। निर्माणस्थलमा सूचनापाटी नराखिएपछि शंका अझै बढ्न पुगेको छ। गोलबजार नगरपालिका–८ का युवा शिव यादव भन्छन्, “सूचनापाटी नै नराखिएपछि कुन योजना हो, कति बजेट छ, कसले काम गरिरहेको छ भन्ने कसरी थाहा हुन्छ?” भौतिक पूर्वाधार विकास कार्यालय, सिरहाका इन्जिनियर शेखरमणि सिंहले भने रातिको समयमा निर्माणकार्य गर्नु कुनै बाध्यता नभएको स्पष्ट पारे।
यस विषयमा पुनः प्रतिक्रिया माग्दा वडाध्यक्ष यादव बोल्न चाहेनन्। हतारमा गरिने निर्माण कार्यको गुणस्तर प्रभावकारी नहुने अवकाश प्राप्त डिभिजनल इन्जिनियर देवनाथ महतोले बताए। उनले भने, “हतारमा गरिने कामको क्वालिटी कन्ट्रोल गर्न समस्या पर्छ।” यस्ता घटनाले सरकार परिवर्तन भए पनि विकास निर्माण गर्ने कार्यशैलीमा उल्लेखनीय परिवर्तन नआएको सन्देश दिएको छ।
