फ्रान्सका कप्तान किलियन एमबाप्पे फिफा विश्वकपको इतिहासमा सबैभन्दा छिटो २० गोल पुरा गर्ने खेलाडी बनेका छन्। उनले केवल २० खेलमै विश्वकपमा २० गोल गर्ने कीर्तिमान कायम गरेका हुन्। २७ वर्षको उमेरमा उनले विश्वकप नकआउट चरणमा सर्वाधिक १२ गोल गर्ने कीर्तिमान पनि बनाएका छन्।
२६ असार, काठमाडौं। एमबाप्पेले उत्तर अमेरिकामा भइरहेको २३ औं संस्करणको फिफा विश्वकपमा अर्जेन्टिनाका कप्तान लियोनल मेसीसँगै केही महत्वपूर्ण कीर्तिमानहरू राखेका छन्। क्वाटरफाइनल अन्तर्गतको पहिलो खेलमा मोरक्को विरुद्ध २-० को जितमा उनले १ गोल र १ असिस्ट गरेका छन्। मेसीले विश्वकपमा सर्वाधिक खेल र गोल गर्ने र ६ पटक विश्वकपमा असिस्ट गर्ने जस्ता महत्त्वपूर्ण कीर्तिमानहरू बनाइरहेका बेला एमबाप्पेले पनि ठूला कीर्तिमानहरू सृजना गरिसकेका छन्।
एमबाप्पेले फिफा विश्वकप नकआउट चरणमा सर्वाधिक गोल गर्ने खेलाडीको रूपमा १२ गोल गरिसकेका छन्। यसअघि उनले ब्राजिलका लियोनिडास र क्रिस्टियानो रोनाल्डोलाई पछि पारिसकेका छन्। २७ वर्षको उमेरमै उनले विश्वकपमा २० गोल पूरा गरेका छन्, जुन मेसीले ३८ वर्षको उमेरमा मात्र पुरा गरेका थिए। एमबाप्पेले २० खेलमै २० गोल पुरा गर्दै सबैभन्दा छिटो २० गोल गर्ने खेलाडीको उपाधि प्राप्त गरेका छन्।
यस विश्वकपमा उनले ८ गोल गरिसकेका छन् र समूह चरणमा नर्वे विरुद्ध बाहेकका सबै खेलमा गोल गरेका छन्। एमबाप्पे लियोनल मेसी र क्रिस्टियानो रोनाल्डोको पुस्तापछि विश्वकप फुटबलको सुपरस्टारको रूपमा उदाएका छन्। यस विश्वकपमा मेसी र एमबाप्पे गोल्डेन बुटका मुख्य प्रतिस्पर्धीका रूपमा देखिएका छन्।
