अपराजित भई क्वार्टरफाइनल पुगेका यी दुई टोलीबीचको खेल आज राति पौने एक बजेबाट सुरु हुँदैछ। फिफा विश्वकप २०२६ को सेमिफाइनलमा आज राति पौने एक बजे स्पेन र बेल्जियम लस एन्जलसमा आमनेसामने हुँदैछन्। विश्वकपमा अपराजित रहँदै क्वार्टरफाइनलसम्म पुगेको स्पेनले अहिलेसम्म कुनै गोल पनि बेहोरेको छैन। बेल्जियमका स्ट्राइकर रोमेलु लुकाकुले यस विश्वकपमा तीन गोल गर्दै डिएगो म्याराडोना, रुडी भोलर र रिभाल्डोसँग बराबरी कायम गरेका छन्। २६ असार, काठमाडौं। स्पेन र बेल्जियम फिफा विश्वकप २०२६ को सेमिफाइनलमा आफ्नो स्थान सुनिश्चित गर्ने लक्ष्यका साथ लस एन्जलसमा आमनेसामने हुँदैछन्। अपराजित भई क्वार्टरफाइनलमा पुगेका यी दुई टोलीबीचको भिडन्त आज राति पौने एक बजेबाट सुरु हुनेछ। राउन्ड अफ ३२ मा अस्ट्रियालाई ३–० ले सजिलै हराएको स्पेनले राउन्ड अफ १६ मा पोर्चुगलसँग १–० को कडा जित दर्ता गरेको थियो। प्रशिक्षक रुडी गर्सियाको टोली बेल्जियमले समूह चरणमा राम्रो प्रदर्शन देखाउन सकेको थिएन। त्यसपछि अन्तिम ३२ को खेलमा सेनेगलविरुद्ध उत्कृष्ट पुनरागमन गर्दै अतिरिक्त समयमा ३–२ को जित हासिल गर्यो। सेनेगलविरुद्ध २–० ले पछि परेको बेल्जियमले उत्कृष्ट पुनरागमन गर्दै ३–२ को जित निकालेको थियो। त्यसपछिल्लो मंगलबारको अन्तिम १६ को खेलमा बेल्जियमले सह-आयोजक अमेरिका लाई ४–१ ले पराजित गर्यो। बेल्जियमको गोल्डेन जेनेरेसनका बाँकी रहेका अनुभवी खेलाडीहरूको यो सम्भवतः अन्तिम बिदाइ खेल हुनसक्छ। प्रशिक्षक रुडी गर्सिया अझै पनि पुराना अनुभवी खेलाडीहरूमा भर परेका छन्। मिडफिल्डमा रचनात्मक खेलका लागि केभिन डे ब्रुइना, रक्षाको बलियो स्तम्भ थिबौ कोर्टुवा तथा विश्वकप इतिहासकै उत्कृष्ट गोलकर्तूमध्येका रोमेलु लुकाकु खेलिरहेका छन्। उत्तरी अमेरिकी भूमिमा लुकाकुले गरेका तीन गोलले उनलाई विश्वकपमा कुल ८ गोलसहित डिएगो म्याराडोना, रुडी भोलर र रिभाल्डोसँग बराबरीमा पुर्याएको छ। बेल्जियमले पछिल्ला ३ खेलमा कुल १२ गोल गरिसकेको छ। बेल्जियमका अग्रपंक्ति राम्रो फर्ममा भए पनि स्पेनको डिफेन्सलाई तोड्न सजिलो हुनेछैन। प्रशिक्षक लुइस डे ला फुएन्टेको टोली विश्वकपमा अहिलेसम्म एक पनि गोल नखाएको छ। स्पेनले विश्वकपका सबै ५ खेलमा गोल खाएको छैन भने बेल्जियमले ५ गोल खाइसकेको छ। मिडफिल्डका मुख्य खम्बा रोड्री, पेड्री र डानी ओल्मो तथा युवा स्ट्राइकर लामिन यमाल सहित २०१० को विश्वच्याम्पियन स्पेनका लागि बेल्जियमविरुद्धको यो खेल आफ्नो नयाँ पुस्ताले इतिहास दोहोर्याउन पूर्ण रूपमा तयार रहेको प्रमाणित गर्ने मौका हुनेछ। यमाल पूर्ण फिट नभए पनि उनले अघिल्लो खेलहरूमा आफुलाई प्रमाणित गरिसकेका छन्। सन् २०१० को विश्वकप विजेता स्पेन सन् २०१४ मा समूह चरणबाटै बाहिरिएको थियो भने २०१८ र २०२२ मा अन्तिम १६ मा पराजित भएको थियो। बेल्जियम सन् २०१४ को विश्वकपमा क्वार्टरफाइनलसम्म पुगेको थियो र २०१८ मा विश्वकपमा तेस्रो स्थान हासिल गरेको थियो। तर सन् २०२२ को विश्वकपमा बेल्जियम समूह चरणबाटै बाहिरिएको थियो। सन् २०१६ सेप्टेम्बरमा भएको मैत्रीपूर्ण खेलमा डेभिड सिल्भाका दुई गोलको सहयोगमा स्पेनले बेल्जियमलाई २–० ले हराएयता यी दुई टोलीबीच भेट भएको छैन। त्यसअघि सन् १९८० को युरोपेली च्याम्पियनसिपमा स्पेनले बेल्जियमलाई २–१ ले पराजित गरेको थियो र त्यसपछिका ११ खेलमा स्पेनले बेल्जियमसँग हार बेहोरेको छैन। पछिल्ला ५ खेलमा स्पेनले १३ गोल गरेको छ भने बेल्जियमले मात्र १ गोल गरेको छ। विश्वकपमा यी दुई टोलीबीचको यो तेस्रो भेट पनि हो। सन् १९८६ को क्वार्टरफाइनलमा निर्धारित समयमा १–१ को बराबरीपछि बेल्जियमले पेनाल्टीमा जित निकाल्दै अगाडि बढेको थियो। चार वर्षपछि समूह चरणमा स्पेनले बेल्जियमलाई २–१ ले पराजित गरेको थियो।
