फिफा विश्वकपमा उत्कृष्ट प्रदर्शन गरेका केप भर्डेका गोलरक्षक भोजिन्हाको सम्मानमा जीवविज्ञानीले नयाँ समुद्री स्लग प्रजातिको नाम ‘अल्डिसा भोजिन्हा’ राखेका छन्। जीवविज्ञानी जेसस ओर्टेआले स्पेनविरुद्धको खेलमा भोजिन्हाले देखाएको ऐतिहासिक गोलरक्षणबाट प्रेरित भई उक्त जीवको नामकरण अनुसन्धान रिपोर्टमार्फत गरिएको बताएका छन्।
विश्वकपपछि भोजिन्हाको लोकप्रियता अत्यन्तै बढेको छ र इन्स्टाग्राममा उनका एक करोड ७४ लाख भन्दा बढी फलोअर पुगेका छन्। २७ असार, काठमाडौं। फिफा विश्वकप २०२६ मा केप भर्डेका गोलरक्षक भोजिन्हा (जोसिमार जोजे एभोरा डायस) ले गरेको ऐतिहासिक प्रदर्शनको सम्मानस्वरूप नयाँ समुद्री जीवको प्रजातिको नाम राखिएको हो। क्यारिबियन सागरमा जीवविज्ञानी जेसस ओर्टेआले रातो रंगको समुद्री स्लग (घस्रिने समुद्री जीव) फेला पारी त्यसलाई ‘अल्डिसा भोजिन्हा’ नाम दिइएको हो।
७५ वर्षका ओर्टेआले आफ्नो अनुसन्धान रिपोर्टमा विश्वकपमा भोजिन्हाले खेलेको असाधारण भूमिकालाई सम्मान स्वरूप यो नामकरण गरिएको बताएका छन्। उनले यो फटीको रातो रंगले स्पेनको उपनाम ‘ला रोजा’ (द रेड वन) विरुद्ध भोजिन्हाले दिएको उत्कृष्ट प्रदर्शनलाई पनि सम्झाउने उल्लेख गरेका छन्। विश्वकपमा केप भर्डे दोस्रो सबैभन्दा सानो राष्ट्र बनेर नक्सआउट चरणमा प्रवेश गरेको थियो। समूह चरणमा युरोपेली च्याम्पियन स्पेनसँग गोलरहित बराबरी हुँदा भोजिन्हाले गरेको उत्कृष्ट गोलरक्षणले विश्व फुटबलको ध्यान आकर्षित गरेको थियो।
केप भर्डेले त्यसपछि समूह चरण पार गर्दै अन्तिम ३२ मा पुरानो विजेता अर्जेन्टिनालाई अतिरिक्त समयसम्म संघर्ष गर्न बाध्य बनाएको थियो। अन्ततः टोली ३–२ ले पराजित भए तापनि भोजिन्हाको प्रदर्शनले विश्वभर प्रशंसा प्राप्त गरेको थियो। विश्वकपपछि भोजिन्हाको लोकप्रियता अचानक वृद्धि भयो। इन्स्टाग्राममा उनका करिब ५० हजार फलोअर केही दिनमै बढेर १ करोड ७४ लाख पुगेका थिए जुन अमेरिकी फुटबलका महान् खेलाडी टम ब्रेडीभन्दा पनि बढी हो। ओर्टेआले यसअघि पनि फुटबलप्रतिको आफ्नो लगावलाई वैज्ञानिक अनुसन्धानसँग जोड्दै कोस्टारिकाका पूर्व गोलरक्षक केलर नावासको नाममा एउटा नयाँ प्रजातिको नामकरण गरिसकेका छन्।
